設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
粵語協會 總覽 魅力粵語 經典對白賞析 查看內容

《賭俠》精選片段

2008-6-24 21:12| 發佈者: highyun| 查看: 5542| 評論: 0|原作者: Ungoo Chan|來自: 本站原創

片段一:决定跟赌神学赌术

剧情:星仔同阿叔不甘贫穷,商量决定跟赌神高俊学赌术。

达:嗱,衰仔,话时话吖,以我哋两叔侄噉嘅人才,有咩理由喺处捱公仔面吖①?系,虽然你赢返嚟啲钱唔可以攞嚟使呀,既然系噉,你不如真真正正学赌术,到时咯喎,赢尽天下嘅黄金美女,靓车靓屋。97之后啲大佬走晒,阿叔实行做李嘉诚!
星:好啊好啊!我做郑裕玲!
达:郑裕彤啊,哼!
星:吖,系。噉我跟边个学好呢?(望到墙上赌神张相)赌——神——!?
达:冇错喇,就系赌神。只要你做咗赌神嘅徒弟,到时就可以赢到飞,赢到开巷②。以后养埋阿叔过世都得啦!
星(揽住阿叔):阿叔!我冇话过养你噃!③

精句点评:
①:「捱公仔面」常被用于形容生活穷困潦倒。其实公仔面都几好食,不过冇益,都系少食为妙。
②:「赢到开巷」重有另一近义词「赢成条街」,即系大获全胜嘅意思。
③:当星仔深情抱住三叔,观众以为佢准备讲啲感动三叔嘅「肉麻话」,谁不知突然讲句噉嘢,真系畀佢吹胀。


片段二:拍Video拜师

剧情:星仔想拜赌神为师,但又怕遭拒绝,于是决定用另类方法——用好窜嘅态度拍Video,引起人注意。

(用脚艰难转动转椅,转到镜头面前)
昨日,我个菲律宾工人行过街市,听到有个卖鱼佬讲话有条友仔叫做赌神,系你。(大笑)我当堂吓咗一跳,然后得啖笑。
(王晶姐姐喂星仔食面,啲面跌晒落件衫度)
呢个世界居然有人自称为赌神,噉即系分明当我流啫。嗱,我叫赌圣,你睇牌都用隐形液晶体眼镜吖,我就睬你都嘥气,直程睇穿牌嘅。呢啲就叫特异功能。
(王晶姐姐取出一只A递畀星仔)
呢度有只烟士,只要我轻轻一捽——就即刻变为一只「巢」咗嘅烟士①,因为我未发功吖嘛,我发咗功呀变副麻雀出嚟都得。你话我果然无厘头啊我够话你瞓醒昂纠纠咯②。望咩啊?条气唔顺呀发个轮过嚟大家研究下,当然你要补返一百几十万过我就唔在讲㗎啦。睥咩啊?学嘢唔使钱呀?抄低我联络电话,系香港3345678,我再重复一次,系香港3345678。你唔揾我我冇所谓,因为呢啲系你嘅损失。十点后钟唔好打嚟,因为我瞓咗③。
(继续食面)

精句点评:
①:当所有人都以为星仔会捽啲咩神奇嘢出嚟嘅时候,得到嘅答案系「一只搓皱咗嘅烟士」——意料之外,却情理之中,令人捧腹。绝对系星爷无厘头嘅经典例子。
②:「昂纠纠」表面形容精神奕奕,实际上谐音广州话粗口,做到既喺尺度之内,又令人会心一笑。
③:本来只有「十点钟后」,但星爷往往钟意改变某啲讲法,改成「十点后钟」并冇人觉得唔妥,反而更加显出拍Video拍到后段佢已经得意忘形。

 

本文版權屬於粵語協會,轉載務必註明出處

最新評論

手機版|Archiver|粵語協會    

GMT+8, 2022-5-20 22:12 , Processed in 0.037931 second(s), 21 queries .

Copyright © 2003 - 2021 Cantonese Association. All Rights Reserved. 粵語協會 版權所有

返回頂部