設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
粵語協會 總覽 魅力粵語 經典對白賞析 查看內容

《九品芝麻官》精選對白

2008-6-27 21:55| 發佈者: highyun| 查看: 7237| 評論: 3|原作者: Ungoo Chan|來自: 本站原創

片段一:穷阿爹与失忆娘亲

剧情:星同阿爹捉棋,此时其侄仔有为嚟到,引发一连串无厘头对话。

包不同:喂,有冇记得我同你讲过,做官呢要清如水,廉如镜。
包龙星:阿爹,听讲你以前都系……
包不同:系吖,我以前系贪官呀。我个花名呢就叫做“挛都拗得直,死都詏返生” ①,因为我阴功事做得多,你嗰十二个大佬我一个都养唔到呀,搞到我年年白头人去送黑头人。真系冇法子喇,我告老归田,将啲家产送晒出嚟做善事,噉样呀,至保返你一条命仔。(转身回屋)所以我而家写咗个字畀你挂中堂。呢,就系廉洁嘅“廉”。
包龙星:横睇掂睇都分明系一个穷字嚟口架喎。②
有为:十三叔啊!十三叔啊!大件事呀!大件事呀!十三叔!阿爷!
包龙星:咩嘢事干③?
包老妈:嚟嚟嚟,食糖水,番薯糖水呀。嚟呀,好靓口架煲得④!九仔呀,食啦。
包龙星:我系十三呀,阿妈。
包老妈:乜我有生咁多个咩?(对住包不同)喂,细路啊,你揾边个呀?
包不同:我系你老公呀。
包老妈:哦哦,噉你呢?
有为:我系你个孙呀,阿嫲。
包老妈:哦……哎唷……咁大个女嘞喎。(对包龙星)老公呀,快啲食啦,唔係冻喇。
包龙星:我系十三呀,阿妈。

点评:
①呢两个俗语形容口才了得,精于辩驳,贴切不过,亦系成齣电影嘅中心思想,后续内容多次呼应包不同呢句话。注意“拗”、“詏”之别。
②“窮”、“廉”草书确实有几分相似。星爷比较呢两个字,一方面起到搞笑效果,另一方面亦令人反思中国“廉字得个贫”嘅官场黑暗。
③“事”、“事情”旧时讲“事干”。唔知系咪受佛山话影响,最近时兴讲“树干”。
④补语前置系粤语特有嘅现象,类似例子有“好好呀(佢)演得”、“癫晒呀(佢哋)玩到”。

 

片断二:赶返戚家食干烧伊面

剧情:包龙星用计收服豹头后,同有为急步赶返戚家嘅婚宴。

包龙星:行快步啦,干烧伊面肯定冇,希望食返碗红豆沙嘅啫。
有为:就快天光喇,有个橙聽偷笑啦。
众人:包大人,包大人……(围上嚟)
包龙星(以为众人过嚟寻仇):喂!我唔系,我唔系,大佬,我唔系!
带头人:包大人,咪行住啦。包大人,我哋知道你神威盖世,两三下手势①就收服咗豹头,救咗戚家上下,我哋系代表戚家出嚟欢迎包大人你口架,大家畀啲掌声!
众人(鼓掌):包大人好嘢!
带头人:包大人,不如同咁多位街坊讲几句说话咧。
有为(耳语):讲句有水准啲嘅。
包龙星(沉思片刻):干烧伊面食咗未?②
带头人:哎!?包大人呀,我哋连乳猪都未食口架,特登留返只猪等包大人你返去慢慢食口架。③
(包龙星喺众人嘅鼓掌中嚟到戚家)

点评:
①做个手势何其简单。所以形容轻而易举搞掂某件事,通常都用“几下手势就×××”。
②无厘头就系“估唔到会噉”,观众势估唔到星爷会讲句咁“有水准”嘅说话,睇嚟呢个芝麻官睇得最重嘅都系“食”。
③粤式婚宴嘅上菜次序系:乳猪(头盘)、其它菜肴、伊面、包点、甜品(红豆沙)、水果。以上对白系围绕呢啲食物展开嘅,饮过喜酒嘅人好易理解对白嘅含义。

 

本文版權屬於粵語協會,轉載務必註明出處

發表評論

最新評論

引用 ading502 2010-4-12 23:11
有語音就好嘎
引用 笑笑要逃了 2009-8-13 14:43
没语音哦,怎么看也不会讲白话啊!
引用 6015687 2009-3-5 05:08

查看全部評論(3)

手機版|Archiver|粵語協會    

GMT+8, 2017-10-18 09:53 , Processed in 0.053193 second(s), 21 queries .

Copyright © 2003 - 2016 Cantonese Association. All Rights Reserved. 粵語協會 版權所有

返回頂部