片段一：初次邂逅荷里玉
背景：常欢刚收工行出录音室，见到荷里玉撞上嚟。
常欢：小姐，有咩可以帮到你？
荷里玉：我想搵嗰个常欢。
常欢：你一定系荷里玉小姐喇，做乜咁夜先上嚟攞奖品呀？
荷里玉：我都知道最美丽嘅嘢一定发生喺夜晚黑嗰度。难道①你就系常欢？
常欢：在下正是。（望住荷里玉胸部）
荷里玉：实在令人太失望喇。我听你把声，我以为你系一个有感性，有电影梦想嘅人。一睇你呢身嘅造型，实在太冇内涵喇。
常欢：（笑）终于都畀我搵到一个认为我系冇内涵嘅人喇。何小姐，介唔介意望住我双眼？
荷里玉：噉又点呢？
常欢：似边个？
荷里玉：E.T.？
常欢：多谢，但可唔可以再望真啲，睇下发觉到啲乜嘢？
荷里玉：好大对眼袋呀。
常欢：对唔住，呢牌比较夜瞓咗啲。介唔介意再仔细啲睇下？睇下里便……
荷里玉：噢，好大粒眼屎呀！②
常欢：啊，对唔住，呢牌比较燥热咗啲。唔通你真系一啲都唔觉得，我嘅眼神好似汤告鲁斯嘅咩？
荷里玉：妖！③
常欢：何小姐，我哋今次嘅邂逅只不过系电影嘅画头，如果继续发展落去必定系一个伟大嘅爱情故事
（荷里玉冷笑，并离去）
常欢：相信重会系三级嘅添！
点评：
①“难道”，粤语往往讲“唔通”，以上对白同时出现呢两个词，不妨比较一下。
②常欢指嘅系眼神，而荷里玉讲紧嘅却系生物上嘅眼睛，呢个就系俄国戏剧理论大师史坦斯拉夫斯基所讲嘅利用事物嘅双重内涵交错所产生嘅喜剧效果。
③某个粗口字嘅谐音，表达一种鄙视态度。
片段二：男人嘅责任
剧情：三兄弟一路食早餐一路讨论常满对老婆不忠嘅问题。
常欢（周星驰）：虽然大嫂系越嚟越猪兜，但你都冇理由喺出面整件二厂①咁过份！
常满（黄百鸣）：老婆如衣服②，我都系多件替换下咋。好似你噉呀？当啲女朋友系臭袜，日日换。
常欢：你乱讲！（摆只脚上台）我经常性都唔着袜口架噃。但系我讲你听，女人呢，其实就好似呢只荷包蛋，沟完，要即刻食，食得呢，就唔好嘥。
常骚（张国荣）：哼！唔使负责任口架呵？
常欢：（笑）沟女其实唔系讲负责任嘅，系讲战术，即系好似打仗噉，我win就win硬，但绝不能收留任何战俘。
常骚：阿欢！男人系要落叶归根要结婚口架。
常欢：我百分之一百支持婚姻制度，我认为一个男人结咗婚之后，应该死心塌地噉做个好老公。
常骚（对常满）：听到未呀？
常欢：所以我死都唔肯结婚就系噉解。
常骚：贱格！
常欢：系淫荡。
常骚：你慌你唔系呀！一个有住家饭唔食要食外卖。你重衰，乜嘢狗屎垃圾你都质落个口，你睇下你吖，成个鸡虫噉样，你顾住发鸡瘟呀你！我都唔明点解你哋一啲道德观念都冇。唔使守贞操嘅咩吓？
常满：噉你又唔结婚？
常骚：生仔好痛口架！③
（阿满同阿骚即时吓到跌杯）
点评：
①“二厂”，即系“二奶”、“第三者”，呢个讲法而家比较少人用。
②广东有句话系“兄弟如手足，老婆如衣服”，实际上系贬低女人嘅地位。
③喺电影入面，Leslie饰演一个基基地嘅角色，讲呢句嘢嘅时候已经当咗自己系女人，难怪两位兄弟畀佢吓亲。
本文版權屬於粵語協會，轉載務必註明出處 | 