設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
粵語協會 總覽 會員文選 會員雜文 查看內容

粵協聚會印象篇

2006-10-18 17:00| 發佈者: highyun| 查看: 1632| 評論: 3|原作者: 余OK、Highyun|來自: 本站原創


余OK回憶部分

  算起嚟我經已係第五次參加粵協聚會嘞,唯一缺席嗰次係喺香港搞嘅。記憶所及,將每次聚會嘅點滴敘述如下:

  第一屆(2003年8月底,廣州-下九路-休閒小站)
  出席人員:Anl,Gary,Highyun,Loist,余OK,制怒,曬月光,西關原居民,豬油渣
  印象中第一屆聚會嘅各式人等層次較廣,如Anl(Anl當時叫Aalon)、Highyun、Gary、我當時尙為學生,Anl同Highyun均喺網站論壇宣傳粵語已有一段時日,其他嘅好似都喺各行業工作。在此先插一段本人認識粵協(当然第一屆聚會時重未叫粵協,當時叫粵語標準化協會,簡稱CASA)嘅過程先:
  我最早接觸研究粵語,緣起自身個性,因自細就對漢字嘅用字有一種天性嘅執着。不過我最初使用粵字係源於上大學後沉迷於上網傾偈嘅樂趣,後嚟逐漸見好多人使用粵字傾偈,於是慢慢亦過渡到嘗試使用粵字嘅阶段(在此之前曾經抗拒打粵字,因為總覺得粵字冇規範性,就唔想侮辱漢字)。之後一直想找尋最好嘅輸入法可以打出更多嘅規範粵字(記得最初使用支持GBK嘅輸入法叫方旻五筆,同學介紹嘅,但後屘仍覺得字庫量唔夠大),亦想接觸更多關於粵字規範嘅資料,於是不時上網搜索搵呢方面嘅訊息。喺2003年初廣州視窗BBS上我畀Anl嘅「粵字正寫我教你」吸引住,遂與之聯繫,从而與一班志同道合嘅朋友認識,自此與現今嘅粵協結下不解之緣。
  該屆聚會中,Gary係一名專業為中文系語言方向嘅大學生,學院派科班出身,懂得一啲我哋唔知曉嘅語言學理論知識,而且好熱愛家鄉嘅「圍頭話」,當時我對佢嘅所知就噉多,且時間已逝冇特別深刻嘅印記;Loist係東莞人,供職於一網站,與Anl、Highyun一樣,自己亦搞咗個人粵語網站,幾有特色;西關原居民就口齒伶俐,且睇得出見識甚廣,口若懸河滔滔不絕(以至後嚟每次都想搵返到佢出席聚會,但不果),後嚟喺大洋網粵群再留意返佢發嘅帖言辭頗有個性,旁徵博引、觀點鮮明、論據充足,睇得好過癮,最有意思嘅係佢因為唔曉打粵語字但又唔想打普語字,於是以半文言打出,呢點亦睇得出佢中文功力有返咁上下(當然我知佢外文同樣好犀利);制怒亦講嘢甚多,但時間隔得耐咗嗰屆聚會對佢嘅印象比較少;其他兩位曬月光、豬油渣就淨記得佢哋好似係粵西嗰邊人,對粵語有興趣,但我對佢哋冇晒印象,後屘喺QQ曾經見過豬油渣一排就消失咗。

  第二屆(2004年8月下旬,廣州-松北-百花冷飲)
  出席人員:Anl,Highyun,Loist,余OK,制怒
  聚會當日風雨滂沱,而且地點偏僻,我諗係導致冇乜人參與嘅原因,但Loist、制怒不辭勞苦喺東莞、新會過嚟,誠為感動(當然我都係喺順德過嚟,祇係冇佢哋咁遠啫,哈哈)。嗰邊雖然係Anl地頭,但地偏廣州一隅,所以對地點選擇大家都頗有微詞(好揀唔揀揀嗰度聚會)。不過喺間士多仔飲住嘢,外面傾盆大雨,另有一番滋味。嗰次聚會都傾咗幾多嘢,Loist重帶咗幾本粵語方面嘅書過嚟添。該屆最大嘅成果就係促成咗今日粵協網站雛形嘅構想並好快就由Highyun佢哋實施(喺當時人手較現時短缺嘅情況下做得到實在難能可貴)。

  第三屆(2005年五一期間,香港-旺角-麥當勞)
  出席人員:Desmond,Anl,Highyun,Gary
  缺席。可以喺香港聚得埋,幾有意思。

  第四屆(2005年11月初,廣州-荔灣路-823 KTV)日頭唱K
  出席人員:Anl,Highyun,余OK,怪盜新一,Yucky,制怒
  (同日,廣州-酒吧街-致香居)夜晚食飯
  出席人員:Anl,Highyun,余OK,怪盜新一,Wai
  呢次包嘅K房消費低、可以坐落嚟傾偈嘅時間長,係地點選擇嘅最佳因素,但因為係K場,難免影響講嘢嘅氣氛。怪盜新一(即Superjill)、Yucky第一次參加聚會,其餘當然都係「老臣子」嘞。新會嘅制怒喺前一日先通知嘅情況下隨傳隨到,認眞唔話得,佢係個生意人,見識比較豐富,活躍於大洋及新華等各大論壇,係典型嘅廣府市井吹得之人(冇貶義),聽佢講嘢,眞有如滔滔江水綿綿不絕,生動之處令人捧腹大笑;而我就帶咗本「家傳寶書」《分韻》畀大家睇吓民國及以前廣東人常用嘅字典(地位我諗差唔多相當於而家小學生使用嘅《新華字典》);Superjill係光明頂嘅fans,喺佢處攞咗唔少料;Yucky係首位female出席聚會,可以載入「粵協聚會歷史」;Wai係留學生,國外見聞多,返到嚟對廣州城烏煙瘴氣頗介懷,晚飯時候趕嚟join埋,talk咗唔少。

  第五屆(2006年3月,廣州-康王路-某越南菜館)
  出席人員:Anl、Ultra、Lucciora各「伉儷」,Highyun,余OK,Superjill
  感覺越南菜麻麻。講吓兩個新面孔:首次有「技術支援」嘅Ultra出席,確實為粵協添磚加瓦不少,開始對粵協組織規範化、網站建設思路等方面提出咗唔少寶貴意見;Lucciora(名字相當繞口)係「西關仔」,但自認廣府話不及其一佛山同學正宗。呢次聚會主要談論咗粵協出路、發展方向如何。

  第六屆(2006.9.23,廣州-第一part荔灣路-世紀明珠海鮮酒家時代房,第二part西門口-某格局狀如適合秘密會議之閣樓)
  出席人員:Anl「伉儷」,Highyun,余OK,Superjill,南漢,Lucciora,Ultra,Desmond,NGF,Yucky(喺閣樓part出現)
  新鮮滾熱辣嘅粵協聚會,自然要將第一手深刻印象奉獻畀大家。聚會雖然係2:30pm先開始,但我中午喺順德過嚟1:30pm就到咗目的地。本來諗住嗰一粒鐘會百無聊賴,但咁啱正正喺嗰間酒家後面畀我發現咗一條舊貨街,有好多舊書舖(相信喺廣州城嗰度嘅舊書舖最為集中,諸君如對舊書有興趣,不妨得閒去嗰處尋吓寶),立即四圍發掘睇有冇寶書。後屘Highyun亦提早到,join埋一齊。最後Highyun買咗一本廣府文化社科類書同一本粵語教程,我就買咗兩本繁體版古代漢語,兩本鋼筆字帖,一本《厚黑學》。
  返回聚會飲下午茶嘅房,Anl「伉儷」、Desmond、Superjill已到,於是balabala就開始一自食一自講嘞。隨後Ultra、南漢、Lucciora、NGF陸續到達。下面講吓呢次啲新面孔:
  南漢同我印象中勾畫嘅形象好唔相符,我見過佢喺大洋網發表嘅文章,又知佢寫過論文,總以為佢係學究型嘅面貌,誰不知佢都係我哋呢一輩人,年紀重比我細。當得知佢準備參加今年嘅粵方言研討會,我着實佩服佢嘅功力。講嘢唔太多,但可能係深藏不露之故。講吓佢嘅口音方面,知道佢努力噉調整咗東莞口音嚟同我哋交流,雖然講廣州話比較生硬且唔標準,但絲毫唔影響交談,n、l分得極之清晰,呢點可以講凌駕於在座咁多位之上,其他啲語音特點要等佢自己介紹先清楚,冇乜細聽。
  Desmond第一次從香港過嚟廣州,除舊年喺香港旺角與Anl哋一聚外首次「省港聯盟」。講嘢都唔多,亦好細聲,離遠檯有時聽唔到佢講乜。不過知佢懂得嘅語音知識較多,不時同Lucciora談論諸如日語、德語、越南語等外語個別語音特點。
  NGF喺另一個論壇見過,睇得出應該好識講笑,如果係講飲講食嘅活動佢可能係調動氣氛嘅能手。
  接落嚟講吓一啲細節印象:
  一、關於當時在座各位粵語嘅口音。今次我特別細聽咗吓各人嘅粵語發音,得出以下觀點:gw圓唇音係我最特別留意嘅地方,廣州人新一代的確發唔好,基本上冇幾個有Highyun同我發得咁正宗同自然(因為佛山同順德以前基本上唔存在呢種懶音,而廣州好早就存在),南漢同Desmond都發得幾好。在座咁多位廣州人即使有留意到呢種懶音,但講出嚟時據推測受自細環境影響仍係好模糊嘅圓唇音(講得快甚至冇),Lucciora同Yucky相對較好,Anl當然就好注意自己咬音唔犯呢類毛病但略欠自然。咁啱我又睇到Superjill今次帶過嚟嘅粵語教程書,開頭提到廣州人發w音時圓唇係好細微嘅,亦印證咗我之前嘅推測:gw懶音絕對唔係香港傳過嚟嘅,係好耐之前以廣州話為母語嘅人(尤其係西關以外嘅)就一直存在嘅一個語音現象,但近呢廿年間先至壓過咗gw正統圓唇音成為主導。不過一個特例就係喺佛山或南海靠近廣州嗰一帶好似Highyun噉嘅新一代人都以廣州話為母語,但受呢種懶音影響相對較少。出咗廣州佛山南海呢一帶及港澳地區,基本上就唔係以廣州話為母語嘞,唔喺呢個討論範圍之列。當然我呢個觀點屬一家之言,還有待語言學家考證。
  二、Highyun同我解釋咗部分粵音韻同音樂嘅關係,都算一知半解噉啦。跟住大家傾咗一大輪,個中topic都涉及到粵語及粵文化若干方面,最引人關注嘅大家都想通過音像媒介宣傳粵協。Anl十月份會客串廣東電臺做講解粵字節目,希望能夠收集多啲資料support到長期嘅節目,由此延伸出嘅各種建議如搞粵協網絡電臺等,都有唔少參考價值。緊接住就係正式「開會」討論Highyun整理好嘅議題嘞,經我哋討論後嘅具體結果,有待Anl整理出嚟,在此就唔表述嘞。
  三、五點半第一part下午茶時間到,大家喺經歷等的士(尤其係黃的——本地司機揸嘅的士,當然係首選啦)及巴士不果嘅煎熬後決定11路車奔赴地鐵站「轉戰」第二part西門口。喺畀「同志們」戲稱翻版某party一大遺址嘅閣樓伴住雪碧汽水齋talk又別具一番情調,唔需多加修飾就同影視劇秘密會議場景形神俱似,眞懷疑我哋係咪搞緊underground revolution,哈哈。第二part延續上一part未講完嘅議題,基本上理清所有思路,雖未必取得突破性進展,但較上幾屆嚟講經已邁出咗一步,大家踴躍提出咗好多有益嘅意見,相信對於如何更加規範粵協及擴大影響力有所稗益。等會議紀要出嚟大家就會更加清楚。
  四、Desmond、南漢因為要趕車返歸所以早一啲離開,其他就差唔多九點喺閣樓告別。我同Highyun、Superjill、NGF、Yucky係最後散band嘅,喺M記食埋嘢talk到10點鐘。每次都感覺意猶未盡,總諗住時間可以再長啲。

  綜觀咁多屆,一年人事幾番新。有啲成員曇花一現後銷聲匿跡,再難尋覓,或許各自需要為生計而奔忙,無暇顧及;有啲就保持常客出席,如Anl與Highyun等「大佬」,余亦忝為一員叨陪末席;有啲就為新血,不斷補充力量,誠然好態勢。還望喺將來嘅粵協聚會中能夠見到更可喜嘅面貌。余為此印象篇,既憶歷屆聚會之感受,並以為粵語仝仁之讀茲篇者勖。

----------------------------------------------------------------

Highyun回憶部分

  好早就想寫返篇回憶錄架喇,不過一直都懶,下唔到决心。余OK寫咗,我終於唔需要寫咁多嘢喇。不過咁多次聚會,唔寫返少少又講唔過去,下面幫余生補充返少少內容啦。
第一届(2003年8月31號)
  當時粵語協會未有QQ群,係喺大洋論壇粵語群落發貼嘅形式發動聚會嘅(當時大洋嘅言論環境重係好寬鬆,所以我經常喺嗰度浮。如果係而家,發親呢類以某個網站或組織形式聚會嘅貼肯定唔出得街),效果唔錯,總共有9個人參加。今次聚會人員嘅最大特點就係大部分人都嚟自大洋論壇,有啲未必對粵語有好深入嘅研究,但絕對每個人都粵語都有深厚嘅感情。不過有啲人可能係一時興致,之後嘅聚會都冇再見過佢哋喇,所以印象唔深。當時我見過面嘅只有Anl,另外睇過Loist嘅相,其它嘅人之前全部都未見過嘅。我記得由於塞車,我係幾乎最遲去到嘅一個,當時全部人企晒喺休閒小站門口度等我,我見到咁多人,非常驚喜。
  我印象最深嘅都係西關原居民,佢講嘅粵語好有西關味,而且見多識廣,好多嘢講,當然,佢講嘅同我哋好啱「合尺」。如余OK所講,制怒亦係博學而多嘢講嘅人(之後嘅聚會可以印證呢様嘢),可惜嗰次坐得比較遠,接觸機會少咗,所以印象唔深。
  嗰次聚會我打印咗一份喺《俗語趣談》論壇度整理落嚟嘅俗語討論,圍繞呢份資料,大家討論咗好多嘢。並商量過點樣擴大粵語協會嘅影響力。

第二屆
  呢屆聚會係最冷清嘅,一來因爲天氣,二來因爲地點,不過呢次聚會令我睇到最忠實嘅粵語支持者。

第三屆(2005年5月2號)
  呢屆余OK冇參加,所以等我講吓啦。
  其實之前我已經喺香港同Desmond見過幾次面,討論設計整合後嘅粵語協會主頁嘅方案。粵語協會網站嘅第一版亦係嗰段時間出爐嘅。五一期間,剛好Anl陪阿媽去香港旅遊,Gary過香港買嘢,而我又咁啱過咗香港,於是决定炮製一次以前諗都唔敢諗嘅「粵語協會香港聚會」。
  嗰日下午,四個人集中之後,就去到旺角新世紀廣場嘅一間飲品店坐低傾偈,從正字、正音,講到生活、文化,我重喺香港圖書館借咗一本珍貴嘅《廣州語本字》。通常呢啲討論都有兩個特點:1、講之不盡嘅話題 2、漫無目的性。另外,有Anl參與嘅討論,都離唔開同繁體字形有關嘅嘢。 
  坐到大概五點半鐘,我哋陪Anl行電器街道,跟住等佢入咗幾間金鋪扮大買家睇金飾,之後移師去太子間M記食嘢。又傾咗個幾鐘論壇嘅粵語化問題,就夠鐘散Band,我同Gary即日返咗大陸。
  呢次聚會嘅感覺就係第一次喺廣州(中國大陸)以外嘅地方聚埋,好有新鮮感。我好希望可以吸引到多啲香港或者海外嘅粵語愛好者加入粵語協會,真正實現省港聯盟,噉以後聚會可以一届廣州,一届香港喇。

第四屆
  今次係唱K,不過查實係得Anl一個喺度唱,其他人都係傾偈,特別係制怒,講咗好多有趣嘅嘢。我去到嘅時候,已經乜都冇得食,唯有餓到晚黑嗰餐,又係選址有問題!
  到傍晚,我哋去咗坊村酒吧街嗰度,之前冇幾耐嗰度發生或幾十人群劈事件,所以我對嗰度嘅治安都唔係太放心。我哋幾個坐低後,都期待Wai嘅出現,差唔多食完嘅時候,踩幾場嘅Wai終於赶到嚟。同我哋一齊傾咗個幾鐘之後,就散Band。其實當時已經超過9點,感覺依然係意猶未盡。今次聚會多咗三個新面孔:怪盜新一,Yucky,Wai。

第五屆
  食越南菜,個個都話唔好,不過可能我餓,食咗好多。今次好多人帶埋另一半過去,我記得盧斯奧華(Lucciora)個女友重帶咗本佢老師寫嘅廣州話教程過去。當時嘅感覺係本嘢好廢,不過唔好意思講出嚟,Lucci哥仔,希望你唔好介意啊。要提嘅係Ultra,之前講咗好耐話網站要企業化管理,今次終於見到佢。佢建議換過個內容管理系統做網站,呢次聚會主要係圍繞點樣搞好個網站界面同內容架構嚟討論。討論嘅結果就係首先做好個網站再做宣傳,呢個第一次有目的嘅聚會,可算係一個大進步。

第六屆
  聚會適逢Ultra斥資購買嘅獨立主機投入運行之際舉行,非常合時。呢次聚會好成功,啱啱聚完,大家都印象深刻。其實今次已經比聚會高咗一個層次,應該叫「粵語協會第一次會議」。好開心Desmond同南漢可以專程過嚟,亦好開心上次甩底嘅NGF同Yucky過到嚟。余OK已經詳細講咗聚會嘅成個過程,我唔再返煲,只係講講今次聚會嘅感想:
1、人數破紀錄,11人,創咗歷届聚會人數最多嘅紀錄。
2、積極齊心。今次令我最開心嘅地方就係參與聚會嘅人都好熱愛粵語協會,每個人都成爲協會嘅主人,好積極好配合參與議題嘅各項討論。
  今次聚會之後令我對粵語協會嘅未來增加咗好多信心,唯一嘅不足之處就係——聚會時間太短。

  以上零碎嘅記憶片段,加埋余OK完整嘅回憶錄,希望可以從更廣闊嘅層面向各位展現到粵語協會嘅生長經歷。
 

發表評論

最新評論

引用 cantonese_yau 2020-9-6 12:37
如果有心人見到,可以來自由粵語論壇 xsden.info 相聚
引用 cantonese_yau 2020-9-6 12:36
唔知而家粵協班人向邊?而家成個bbs烏蠅都唔多隻
引用 cantonese_yau 2020-9-6 12:34
廿年人事百番新,可惜生遲十幾年

查看全部評論(3)

手機版|Archiver|粵語協會    

GMT+8, 2022-1-18 11:48 , Processed in 0.038317 second(s), 18 queries .

Copyright © 2003 - 2021 Cantonese Association. All Rights Reserved. 粵語協會 版權所有

返回頂部