我查過《國語辭典》及國內軟件《金山詞霸》，都搵唔到「文讀」、「白讀」呢兩個詞。
引一位網友言：『文白異讀確實存在，普遍來說，文讀是指讀書時的發音，而白讀則指平時口語的發音。』
確實存在？有何根據？與其講「文白二讀」，不如講「正俗二讀」。
不過同樣，「正讀」亦都查無此詞。
但根據《國語辭典》及國內軟件《金山詞霸》「異讀」、「俗讀」卻有解釋：
【異讀】
《國語辭典》[解釋]『一個字具有數個不同的讀法。如波可讀成ㄅㄛ或ㄆㄛ。』
《金山詞霸》[解釋]『一个字具有不同的讀音,如“尾”字讀 wěi，又讀 yǐ。』
【俗讀】
《國語辭典》[解釋]『通俗的讀音。如：「現在有許多字俗讀有誤，但已積非成是，正確的讀音，反而很難讓人接受。」』
《金山詞霸》[解釋]『一般人習慣的讀音。』
(《國語辭典》「俗讀」例子中有提及「正確的讀音」，「正讀」亦說有根據。)
如依「文讀」字面理解，即讀書音，與白讀口語音有別。
舉個「青」做例，《廣州話正音字典》規定讀「cing1」係文讀，讀「ceng1」係白讀。
「舞獅採青」，用廣州話讀，必定讀「mou5-2獅採ceng1」；讀「mou5獅採cing1」就變得好死板，而且廣州人根本唔會將生動嘅廣州話講成噉。
又如「精」字，有學者講：讀zing1文讀，讀zeng1白讀。
若依文讀，「精叻」、「精乖」就係「zing1叻」、「zing1乖」。讀出嚟都冇人識。文讀有意義咩？
「文白二讀」係一個硬性規定嘅詞，定會畀人搵到錯處。
但「正俗二讀」係彈性詞，唔會畀人挑到骨頭。
又如「精」，
用於「精乖」、「精叻」，讀zeng1係正讀。
用於「精神」、「精靈」，讀zing1係正讀。
「舞獅採青」，讀「mou5-2獅採ceng1」就係最啱嘅正讀。你可以挑「正俗二讀」嘅骨頭？
但若「文白二讀」咁硬性規定一個字讀音，正如「精叻」文讀一定要係「zing1叻」。都冇人明你讀乜。
「語文」，係先語後文，自古就先有語言後有文字。
語言文字都係交流工具，講出嚟寫出嚟都要有人明白，唔會含糊不清就叫做完美。
讀出「zing1叻」呢種文讀，既然人哋唔會明白，有意義咩？所謂「文讀音」目的都係爲咗人哋聽得明啫。況且要「讀」就肯定用「言」讀出嚟，「言」字都含有「口」字在內，言者與口有關也。既然用咗「口」先可以讀出嚟，即白讀亦無妨。
我喺呢度大膽向各界人士提出，否決「文白二讀」，取而代之嘅係「正俗二讀」；或者可以有「文白二讀」，但唔應該硬性規定某個音係文音，某個音係白音。
依我之見，假如保留「文白二讀」，則從「正俗二讀」中，將正讀音定爲文讀音，將俗讀音定爲白讀音。
舉個例：「年輕人」一詞，可讀「年hing1人」，亦可讀「年heng1人」，可以將「年hing1人」定爲文讀，將「年heng1人」定爲白讀，實質上就係「正俗二讀」嘅另一種形式，此舉更加適合。
本文版權及解釋權歸原作者所有 | 