大穫（喊都無謂行動最實際）

（一）大件事

　　二零零五年一月份香港中文大學國際化事件驟眼睇似乎係中英文之爭，若果認眞分析成件事，背後隱藏嘅危機一啲都唔講得笑！佢一針見血噉暴露咗香港咁多年嚟一個無可爭詏嘅疏忽：廣東話（粵語）喺語言、文化、教育上冇受到重視嘅事實！呢個疏忽唔單單削弱香港人嘅「香港感」，佢重對中國甚至世界文化上都有負面影響。

　　就香港嚟講，身爲香港人（甚至乎其它粵語區人），我母語就係我社會文化根。唔尊重母語等於輕視以佢作爲母語嘅人喺社會各層面上嘅正常、和諧發展潛能。 呢種自我貶值、自卑心態已經造成粵語退化（懶音、普通話式粵語歌曲、講話、英文化等現象），失去創造、競爭力（越嚟越少外國人學粵語……）。

　　相對於中國，香港若果放棄粵語作爲母語，後果係損失一個帶頭維護中國多元語言文化嘅作用。唔使講大家都知中國係個多元民族、多元文化嘅「共和」國。 粵語嘅遺棄會間接影響其它中國文化語言嘅保存同打底。

　　喺國際舞臺，粵語（同埋客家、閩南、吳……），作爲古漢語（順便提你哋佢有超過兩千年歷史）活化石，佢嘅缺席將會阻礙其它非中文地區對中國文化眞正嘅認識，亦都阻礙世界文化和諧發展。

　　喺中國全面推普下大家係咪要反省一下各地區語言同普通話互存嘅關係？

（二）乜乜物物

　　一講起粵語一般香港人（同部份國內同胞）就會一口咬定佢唔寫得、唔正確、唔文明。之不過當一個語言可以有效、優雅噉畀廣大民眾用嚟表達自己嘅感情，從事經濟文化活動，呢個語言，唔理口講定手寫都絕對係正確、文明嘅語言。有啲人甚至乎講粵語唔係中文！呢層好多語言專家會否定呢個講法：粵語唔單止係中文，重係中文中最有中文氣質嘅中文之一。

　　中文 ＝ 中國文化圈語言總和
　　中文 ≠ 單指普通話

　　亦有人口出狂言認爲中國人唔講普通話就唔係中國人！噉放棄自己母語嘅算咩人？至於無厘頭、通俗等呢拃戥興說話，大家唔好忘記風格係因創作者而定，若果粵語有廣大民眾嘅認同，佢唔會有今時今日嘅地步。 若果粵語有廣大民眾嘅支持，佢會散發更多文化風格。現時粵語齋有口語地位，大家有冇諗過佢都可以喺文學、科學上……有所貢獻？

　　粵語（廣東話） ＝ 語言，講得，寫得出

（三）道理一字咁淺

　　香港人嘅母語係粵語而唔係英文、普通話。 但係三者絕對可以共存。有人會打蛇隨棍上講三者共存會造成混亂。粵語作爲一個同普通話差唔多嘅語言點解嘥咁多精神時間去維護，不而就改用普通話或者英文作爲母語。咪住先！一個語言嘅價值唔可以單從方唔方便度考慮，故此維護粵語係在於佢賦予每一個人一種靈活、自然、和諧嘅「小宇宙」去理解世界，發展內心，發揮個人各文化層面潛能。 除咗母語冇邊一種語言可以畀到你呢種輕鬆自然力量。相反，掌握唔好母語會導致「無能表達」、「不能盡興」等嘅屈就感覺，呢啲冚口棒唥都係阻礙社會經濟文化進步嘅毒藥。另外，放棄母語教學絕對唔合乎經濟效益。