借夜闌靜處/獨看天涯星/每夜繁星不變/每夜長照耀……
悠然嘅旋率加上深邃嘅歌詞意境，使人彷彿置身於一個初秋嘅深夜，憑窗遠望星空，思緒萬千，憶起無數往事，猶如重返昔日初聽此歌時嘅歲月中。
最近經常聽呢首偶然拾回嘅舊歌《但願人長久》，提起歌名，每個人都會首先諗起鄧麗君原唱嘅以蘇軾名作為歌詞嘅經典之作，但其實呢首盧冠廷原唱嘅香港本土同名作品，亦係一首難得嘅佳作，否則，就唔會吸引到林子祥同張國榮先後翻唱。
但願人未變/願似星長久/每夜如星閃照/每夜常在
呢句歌詞，我每次聽到，心靈都會産生一種莫名嘅觸動。「但願人未變」只係一個美好嘅遠望，實際上，我哋身邊嘅人正隨住時間流逝而每日都喺度變：父母日益蒼老，孩兒嘅誕生，舊友嘅疏遠，新朋嘅結交……正所謂十年人事幾番新，十幾年前或者都係企喺同一個地方仰望同一個星空，但經歷過城市環境嘅變遷，經歷咗身邊人事嘅變幻，今日嘅我多咗一分物是人非嘅唏噓……
漫長夜晚星若可不休/問人怎麼卻不會永久
但願留下是光輝/像星閃照漆黑漫長夜
地球與星辰歷億年而依舊，但人生只有短短數十年，對於漫長嘅宇宙只係微不足道嘅瞬間。人又點可能好似天上嘅星星噉，永恆不變呢？人唔單止會變，重會有生老病死，但短暫嘅人生的確可以如星星咁光亮，永恆照亮後世。就如呢首歌其中一位演唱者哥哥張國榮，今日已經離開咗呢個世界，但當我哋見到天上光嘅星星，就會諗起呢位巨星，諗起佢每一首回蕩於我哋耳邊嘅金曲。
人有悲歡離合，月有隂晴圓缺，萬物變幻無常，唔變嘅，或者只剩低自己嘅一份情懷……
本文版權屬於粵語協會，轉載務必註明出處 | 