大鄉里入城

有句俗語呌做「大鄉里入城」，諷刺人未見過世面。舊時鄉下人怕人笑佢冇見識，就話自己「多見蠄蟝蛇，少見砵砵車」，形容自己未見過世面。不過，風水輪流轉，今日「蠄蟝蛇」早已入饌成爲城市人美食，而每逢放禮拜足球聯賽時間，波地周圍泊得最多係挂四鄉車牌嘅「砵砵車」，就知道今時唔同往日，一個沙梨兩個核。「大鄉里入城」之講法，經已不合時宜，逐漸消失。

    舊時，四鄉人入省城揾食，驚人睇唔起，都識得講幾句自謙說話，但語氣近乎開玩笑，純屬得啖笑。最甩癮係呢段：「我最遠入過城，最深落過井，最高上過瓦背頂，最靚食過醬土鯪，着衫着曬薯莨，食烟食棺材釘，成世仔未見過平洲福肉餅。」今時今日，就算你口粵語講到啪啪聲，怕且都仲係有成半睇唔明。

    逐句逐句解畫：「出城」即出省城廣州，易明之極；醬土鯪係用醬腌製過嘅鯪魚——家鄉美食，零舍不同；「曬薯莨」係以黑膠綢布料做嘅衫，黑膠綢係塗有薯莨汁液嘅平紋絲織品，適於作夏季衣料，主要産於廣東。「棺材釘」係一種自製烟卷，頭大尾細，而有包裝嘅正規捲烟，呌「煙仔」，此前已有專文論及。

至於「成世仔未見過」嘅「平洲福肉餅」，係特色美食，歷史悠久，有說清同治年間面世，亦有説誕生早於清嘉慶年間嘅盲公餅。奈何名氣稍遜，不如佛山盲公餅、中山杏仁餅、西樵大餅同埋廣州河南成珠茶樓雞仔餅。福肉餅歷來只係細間茶樓或細作坊出品，冇老字號依托，「蓬門未識綺羅香，擬托良媒亦自傷」。