設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
粵語協會 總覽 廣府話趣 俗話溯源 查看內容

食擔豬膏未落膈,見身喐唔見米白

2015-4-15 00:49| 發佈者: highyun| 查看: 2310| 評論: 0|原作者: 五世其

摘要: 廣府人講說話,好多時同農業耕作有挐掕,當傳統生活景象逐漸式微時,坊間好多生鬼、抵死、到肉嘅講法就冇咗根𣚦,故之然現代化咗嘅廣府話今時唔同往日,聽落就倔擂槌唔夠「親民」。 ...

  近幾十年,衆人皆奉「發展是硬道理」為金科玉律,莫講話個個城市一個模咁倒出嚟,淨係一大拃石屎森林,好惡搵返舊陣時嘅風貌,就連好多城鎮農村啊,都同以往嘅生活狀態好唔一樣,乜都話加速現代化。而廣府人講說話,好多時同農業耕作有挐掕,當傳統生活景象逐漸式微時,坊間好多生鬼、抵死、到肉嘅講法就冇咗根𣚦,故之然現代化咗嘅廣府話今時唔同往日,聽落就倔擂槌唔夠「親民」。

就以「見身喐唔見米白」為例,若果冇返啲生活體驗,就算你曉噏,都像唔出呢句說話係點嚟嘅。正所謂「知其然而不知其所以然」,唔少人都知係愛嚟形容有啲人周身冇時停、彳亍咁轉,一味喺處好落力咁做嘢,但係收效甚微、冇乜得着,譬如講啲咕喱辛水辛汗先賺得嗰一個幾毫,學生哥死咪書但係成績點都出唔到嚟,都可以話係「見身喐唔見米白」,至於「米白」,係同舊時尋常人家「舂米」個動作有關。舂米就係由上而下使力,分開穀嘅同米,喺機械化未普及嘅年代,通常啲人家屋企或者作坊仔、磨米間,就係𢬿舂坎嚟搞掂喇。

舂坎係用石整嘅,中間掏空,圓身尖,座响地底,長木枋造嗰條就叫𣝉[deoi3],先係將啲谷放晒喺內坎,跟住利用杠桿原理,一個或兩個人喺𣝉[deoi3]尾用腳踹住,一𧿁[ngat6]𣝉[deoi3]頭掕住嚿鐵就一下高一下低咁舂嘞,啲谷舂到咁上下嘅時候,啲米肉嘅白色咪出咗嚟囉。之但係呢種咁嘅簡易架撐效率好低,一般舂好耐都舂唔得勻晒啲穀,舂完咗仲要篩走啲糠,有啲未舂得透嘅叫做大穀,仲要攞窩𨹄(簸箕)轉吓等佢埋心,執返出嚟,然之後先簸到啲米剩返落嚟,咁先叫做有米食,若果手勢唔好執唔出啲大穀,就畀人話你唔曉做米。成個過程都幾𨉣[haa1]人做同耽工,收屘整整吓都冇乜人舂米嘞。「見身喐唔見米白」成句就係話𧿁[ngat6]咗半日都未見啲穀甩殼,個心唔煩就有鬼嘞。所以有時要了解某啲俗語嘅來源,真係要問吓啲老人家至得。

  講開又講,若果有人問起zung1瘟雞同瞌眼瞓zung1zung1吓個「zung1」點寫,睇完以上內容相信都應該曉教人,就係舂坎個「舂」,都係形容動作𩕟[ngap6]𩕟[ngap6]吓,下次咪個寫錯喇。仲有,去開赤柱有時間不妨行埋舂坎角,嗰處風景幾好。


最新評論

手機版|Archiver|粵語協會    

GMT+8, 2020-9-29 08:37 , Processed in 0.071694 second(s), 22 queries .

Copyright © 2003 - 2016 Cantonese Association. All Rights Reserved. 粵語協會 版權所有

返回頂部