設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz

再見,白話廣州

2015-4-20 21:41| 發佈者: gzshuzha| 查看: 1063| 評論: 0|原作者: 阿展|來自: 南方都市报

摘要: 再见,白话广州!语言嘅独特性系祖宗留落嘅财富,你继续讲,就有运行。一觉醒来,你或者会习惯落街买份南都,不过就唔会再有「白话广州」。唔舍得都要讲:再见,白话广州。 ... ... ...
再见,白话广州
时间:2015-03-26   
偷听人讲
  阿展
  呢个真系令人伤感嘅消息,「白话广州」要同我哋讲拜拜。日后,冇咗「白话广州」嘅广州会唔会单调咗啲呢?希望唔会。歌仔都有唱,「THE SHOW MUST GO ON」。精彩必将继续,生活必须继续。冇咗「白话广州」,广州仲系满街讲白话。冇咗「偷听广州」,广州人会唔会冇咁八卦吖嗱?梗系唔会啦!风继续吹,水继续流,白话继续讲。离开广州,你会挂住广州;返到广州,你会舒服晒。听到周围讲白话,你会有一种安全、淡定、亲切嘅感觉。因为讲白话嘅氛围,后面有悠久嘅历史,有好多自细听返嚟嘅名人故事,有岭南人嘅人情世故,有冇「白话广州」,白话都会一直喺你我左右。
  好多人担心白话会逐渐消亡,老实讲,我冇咁悲观。冇错,「白话广州」系广州呢个大城市咁多报纸中,唯一推崇本土文化,反映本土人生活嘅版面,而家都要折埋,确系令人感慨。不过,白话后面有岭南文化呢个强大嘅背景支撑,有咁强嘅独特性,有越来越多嘅后生一辈「撑」,使用白话嘅群体遍布全球,老实讲,我睇唔到白话有消亡嘅可能。白话保留咗最多嘅古汉语痕迹,同时又吸收咗好多潮语,同北方语言形成强烈对照,呢啲珍贵嘅差异,口耳相传,值得我哋珍惜,研究,传承。最令人欣慰嘅系,近年越来越多嘅后生,识得文化保育嘅重要,有佢哋,岭南文化一定后继有人。
  南都冇咗「白话广州」,话唔埋另一个白话专栏又会喺第二度出现。冇咗「偷听广州」,肯定仲有人会静鸡鸡录低你嘅言行,或者用笔,或者录音,或者影相。广州人嘅淡定,宽容,幽默,精明,蛊惑,都有机会一一重现,因为佢好独特,唔系粤人学唔番。
  「偷听广州」出咗一千几期,全部来自广州人嘅日常生活。时代变迁,语言变化系肯定嘅。唔同时期有唔同时期嘅语言,语言变化记录社会嘅变迁,为后人留低多少痕迹,呢个就系「偷听广州」嘅初衷。好多谢大家嘅捧场。我曾经见到有人喺地铁车厢睇「偷听广州」,笑到前仰后合。我曾经买晒一个报摊嘅南都,喺地铁口向每个人免费派发,因为当日南都有「偷听广州」。我唔知日后仲会唔会有「偷听广州」专栏,不过我肯定,呢度嗰度,有一日我实会同你再见,因为你讲白话。
  再见,白话广州!唔使太悲伤,我哋只不过同一个版面讲再见,白话唔会离开广州。再见,白话广州!唔使太激动,我哋好多谢你以前推广白话不遗余力,令广州仲有白话语文嘅一席之地。再见,白话广州!语言嘅独特性系祖宗留落嘅财富,你继续讲,就有运行。一觉醒来,你或者会习惯落街买份南都,不过就唔会再有「白话广州」。唔舍得都要讲:再见,白话广州。

手機版|Archiver|粵語協會    

GMT+8, 2017-2-28 23:09 , Processed in 0.204656 second(s), 18 queries .

Copyright © 2003 - 2016 Cantonese Association. All Rights Reserved. 粵語協會 版權所有

返回頂部