設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz

賭仔輸清踎街頭 後悔自嘆亦無收

2015-7-6 18:43| 發佈者: highyun| 查看: 4800| 評論: 0|原作者: 謝主隆

摘要: 《賭仔自嘆》講述一個賭仔賭錢輸清光,後悔不已嘅故事,有勸世意味。全曲諧趣生動,夾雜大量廣東話俚語,係貨真價實嘅「廣東歌」。

一九四八年香港第一部彩色電影《蝴蝶夫人》嘅插曲《載歌載舞》,由一位叫「馬仔」嘅馬來亞華僑填上《賭仔自嘆》歌詞,後經「東方貓王」鄭君綿重新演唱後,馳名天下,《家有喜事》中,周星馳飾演嘅常歡亦「黐咗綫」時唱過。《賭仔自嘆》講述一個賭仔賭錢輸清光,後悔不已嘅故事,有勸世意味。全曲諧趣生動,夾雜大量廣東話俚語,係貨真價實嘅「廣東歌」。

 


伶冧六、長衫六、高腳七,一隻大頭六,

二三更,瓜老襯,輸到我木。

日夜賭場嚟侍候,生意唔撈我兩頭遊。

我嘅錢輸晒咯,真係無收。

食更青,頂肚癮,搵菜頭。

劃積又怕佢彈返轉頭,

揾阿竉借,佢又擰吓擰吓頭,

籌碼部,佢又詐嬲,

我拈出碼頭把本收,

爛手表,都當晒,冚𠾴唥冇留。

祖先不開眼,個伶伶又跟佬走(鄭君綿版本爲:「令我呀好擔憂」),

從前知道係咁醜,

我就唔使踎街頭。

 

歌詞解畫:

伶冧六、長衫六、高腳七、大頭六——均爲牌九組合花式,講多無謂,睇圖。

 


瓜老襯——「瓜」、「老」、「櫬」每個字都同死有關。「瓜」爲「冬瓜豆腐」之簡稱,即「遭遇不測而死」;「老」爲「老死」;「櫬」,「棺材」另一稱呼,乃「行將就木」之謂。所以「瓜老櫬」認真「大吉利是」,且通常帶貶義,故此少講為妙!

食更青——歌詞由馬來亞華僑所寫,「食更青」正係馬來亞地名Sekinchan之譯音(今呌「適耕庄」),係大馬著名嘅魚米之鄉。歌詞意思就係輸晒啲錢,冇錢食飯,唯有畫餅充饑,幻想一個好多嘢食嘅埞方,諗咗當去咗。

劃積——「積」實為「cheque」之諧音。「劃積」查實係寫支票,皆因寫支票時,簽名之後通常會讕有型咁劃一嘢。

阿竉——大耳竉。

伶伶——打伶,darling之譯音。

踎街頭——踎喺街頭揸兜乞食。


 

 

順帶提吓,原嚟《賭仔自嘆》仲有個改編版本,名曰《為食經》,睇完頭兩句相信冇人不曉。

燒雞翼,我自細鍾意食,

燒乳鴿,好過食筵席,

甘香,可口,我最恨食。

日日辛勞原為了搵食,

雞鴨魚蝦應該多進食。

提醒你,多食有益,

脂肪蛋白最有熱力。

我認真肥壯十分有型,

體格真健美,學我密咁食,

我強壯兼有力,實冇生癪,

我出名大食,食嘢真刺激,

花生,水果,更富活力。

豬肝兼豬肚,每日食過至心息,

肥圓蹄更重有益,係嘢都想食。

 


引述詞評人黃志華先生一句話:「人說杜甫詩無一字無來歷,星爺電影也可能無一格膠片無來歷」。確實如此。

最新評論

手機版|Archiver|粵語協會    

GMT+8, 2017-11-19 16:27 , Processed in 0.059874 second(s), 22 queries .

Copyright © 2003 - 2016 Cantonese Association. All Rights Reserved. 粵語協會 版權所有

返回頂部