設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
粵語協會 總覽 廣府話趣 漫話粵語 查看內容

冇咗入聲 邊有感情?

2015-8-6 18:42| 發佈者: highyun| 查看: 4208| 評論: 0|原作者: 謝主隆

摘要: 粵語入聲嘅作用,當然唔淨只係將「貝克漢姆」、「克林伊斯特伍德」等譯名變爲更簡潔潔嘅「碧咸」、「奇連伊士活」咁簡單。入聲之語言魅力在於能够表達多種特別嘅感覺,令粵語增色不少。 ... ... ...

       時時有人話北方官話冇入聲,粵語有入聲,實情乜嘢係「入聲」?入聲係古漢語經已有嘅一類音節結構,調型短而急促。以粵語拼音表示,就係以ktp爲音尾嘅字,如「塞」([sak1])、「發」([faat3])、「十」([sap6])。

粵語入聲嘅作用,當然唔淨只係將「貝克漢姆」、「克林伊斯特伍德」等譯名變爲更簡潔嘅「碧咸」、「奇連伊士活」咁簡單。入聲之語言魅力在於能够表達多種特別嘅感覺,令粵語增色不少,玆舉例如下:

急疾感、突然感,如「忽」、「霍」、「猝」等字,聽落又「直」又「促」;

逼迫感、抑鬱感,如「窒」、「戚」、「屈」、「泣」等字,聽落使人頓生悲哭抽噎時嘅凄惻感覺,更聯想到李清照首〈聲聲慢〉;


錯愕感,乾涸感,如「嚇」、「殺」、「酷」、「烈」等字,讀後或聽完,都易令人産生呼吸不順以及喉嚨乾涸嘅反應;

阻隔感、距離感,如「絕」、「裂」、「滅」等字,聽落有「斯物逝去」之感受,若記得〈江雪〉一詩,必有更深體會;

吸納感,包圍感,如「合」、「集」、「貼」、「夾」等字,發音時雙唇緊閉,充滿收藏、容納嘅感覺;

用力感,堅决感,如「絕」、「訣」、「拔」、「奪」等字,只要讀下岳飛嘅〈滿江紅〉,就明白之所以岳飛揀入聲做韻脚,查實係想表達光復河山,絕不妥協嘅决心。

       若然呢批入聲字讀成[ji ji][jue jue][ji he][ku lie][yu jie],就真係好難想像如何「急疾」,如何「决絕」,如何「集合」,如何「酷烈」,如何「鬱結」,之不過,若有朝一日見到粵語冇咗入聲,相信好多人會倍添「鬱結」之感。

最新評論

手機版|Archiver|粵語協會    

GMT+8, 2017-9-24 23:48 , Processed in 0.053331 second(s), 22 queries .

Copyright © 2003 - 2016 Cantonese Association. All Rights Reserved. 粵語協會 版權所有

返回頂部