頻臨失傳縮脚語轉彎講嘢最得意

2015-9-11 17:01| 發佈者: highyun| 查看: 1896| 評論: 0|原作者: 謝主隆

摘要: 粵語最過癮之處就係好多嘢唔直接講出嚟，轉個彎嚟表達，到對方諗出答案時，必定會心微笑。曾經甚爲流行嘅縮脚語，最能顯現廣東人之鬼馬。

睇粵語長片，有句對白相當得意：「嗰條友仔又嚟搵你，慌唔係『茅根竹』」咩！」「茅根竹」係句縮脚語。所謂縮脚語，又呌「藏尾」，係將一個固定短語最後嗰個字或詞隱去，但所要表達嘅却正正係隱去嗰部份。譬如「茅根竹蔗水」，只講前半橛「茅根竹」，聽者自然會聯想到後半橛嘅「蔗水」，諧音「借水」，粵語長片嗰句對白即係話「條友又嚟搵你借錢喇！」

茅根竹蔗水

民國時曾任廣州市長嘅李福林（字「登同」），亦出過兩句經典縮脚語，時任佢下屬嘅何劍吳俾佢嚇到出走，霸氣「李燈筒」就對中間人講：「呌佢唔好走佬，乖乖地返嚟。只要佢聽我話，就保得住佢條三軍司，如果唔係，就小心佢個酸薑蕎！」由於「三軍司命」同「酸薑蕎頭」都係當時嘅熟語，講「三軍司」同「酸薑蕎」，則「命」同「頭」已呼之欲出。

李福林

粵語最過癮之處就係好多嘢唔直接講出嚟，轉個彎嚟表達，到對方諗出答案時，必定會心微笑。曾經甚爲流行嘅縮脚語，最能顯現廣東人之鬼馬，例如「等我兩分鐘，我洗下個雲吞（面）先」、「你咪挂住睇熱鬧，睇緊自己個祖宗三（代，諧音『袋』）」、「出咗一身成吉思（汗），飲返杯一江春（水）」。可惜，世易時移，呢種縮脚語日漸式微，經已冇乜人識聽識講，仍然流行緊嘅，只得一句：「今次又係我做柴可夫！」

收藏分享邀請

上一篇：連鎖店寶號論盡麥當勞下一篇：名人典故入俗語描寫比對更得意

		自動登錄	找回密碼
密碼			註冊

頻臨失傳縮脚語轉彎講嘢最得意

最新評論

相關分類

頻臨失傳縮脚語 轉彎講嘢最得意

最新評論

相關分類

頻臨失傳縮脚語轉彎講嘢最得意