古代已盛龍陽癖 「契弟」原來係男色

今日，同性戀仍未爲社會廣泛接受，被視作另類癖好，用詞多帶貶義。最具侮辱意味者可算係「屎窟鬼」。何解同「屎窟」有關？畫公仔無謂畫出腸。

另一個係「契弟」，字面上雖有「哎吔細佬」嘅意思，但身爲結拜細佬嘅，冇邊個樂見哎吔阿哥呌佢做「契弟」。「契弟」聽落亦覺唔係好嘢，但未必有幾多人知同「基佬」有關。舊時，「契弟」即係男色，專指供女人包養以及供男人玩弄嘅男人，講白啲就係男妓或者男同性戀者。清末民初中外人士記載嘅地方文獻，亦有收錄此詞，譬如民國八年版嘅〈廣州指南〉，介紹廣州方言詞語就有「龍陽君曰契弟」一句。

講起龍陽君，電視迷大多會諗起蓋鳴暉，皆因佢喺TVB齣〈尋秦記〉裏頭做龍陽君嘅形象太深入民心，睇佢望住項少龍深情嘅眼神，就算未聽過「龍陽之癖」，都知道呢位歷史名人體內嘅男性荷爾蒙唔慌多得去邊。查實，龍陽君係戰國時期魏王嘅男寵，係中國正史上第一個有記載嘅同性戀者。後嚟，以「龍陽」指代男色，古人稱以男色（服）侍人者為「龍陽子弟」，而喜好男色嘅癖好就稱爲「龍陽之癖」。

古代另一廣爲人知嘅同性戀代名詞係「斷袖分桃」，斷袖之癖係關於西漢漢哀帝同董賢嘅古仔，話說哀帝要起身上朝，但瞓喺側邊嘅董賢壓住佢一隻衫袖，哀帝唔忍心嗌醒董賢，於是乎割斷董賢壓住嘅嗰隻袖（好彩係割斷隻衫袖啫，若然阿哀帝想董賢變成真正嘅女兒身，割咗第樣嘢，就大檸樂！）；而分桃則係講春秋時，衛國大夫彌子瑕受衛靈公寵愛，有日瑕瑕摘咗個桃，咬咗一啖覺得甘甜可口，然之後將剩低嘅餵畀靈靈食，靈靈冧晒，猛讚瑕瑕對自己好。因此「斷袖分桃」講嘅查實都係男人之間甜蜜嘅愛情故事。

睇落，似乎古時候嘅性觀念仲開放過而家多多聲。