設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
粵語協會 總覽 廣府話趣 舊派廣東話 查看內容

電母舊底稱「攝爧」 雷公自古得人驚

2016-8-22 18:46| 發佈者: highyun| 查看: 1533| 評論: 0|原作者: 塞翁失

摘要: 「風雷雨電」四大當家,講完「風雨」,點少得「雷電」。

  前文再續,書接上一回。打完「風舊」,落完大雨,係時候講下「行雷攝爧」(有說「攝」本字爲「霅」。「霅」有「涉」音,依《說文》,即是「霅電」。「爧」讀「])。舊時廣府人講嘅「攝爧」即係家陣書面語所寫嘅「閃電」,「爧」字喺《廣韻》裡頭解做「火光貎」,意思亦即係睇落去好似天上着火發光咁。「電」共「爧」都係講緊同一樣嘢。須知道,雷聲長,電光快,廣府話「行雷攝爧」兩個動詞正正反映此自然現象:

  「行」 字陽平聲,發音時間長,低沉有力,感覺如「行雷」時嗰陣「轟隆隆」嘅感覺;而北方話個「打」字呢,發音上揚,頭重腳輕,飄忽無力,無論形象抑或氣勢都稍遜一籌。


  「攝」字係入聲,發聲時間短促,有不及掩耳之勢。而個「閃」字係上聲,發聲時間長咗啲,唔夠貼切。再加上「攝」字有一種「震懾」意味,好似一下「攝爧」就將你嗰三魂七魄「攝」走咗咁。都咪話廣府話唔生動鬼馬!


 

  舊時科技唔發達,常人冇法子解釋雷電雲雨現象,於是就作出一班又「雷公」、又「電乸」等等嘅神仙出嚟,再加上廣府人嫉惡如仇嘅心態,就將雷電劈死人嘅自然現象講成係上天懲罰壞人。而且個「雷公」四圍都去得到,壞人無所遁形,而要匿去到「冇雷公咁遠」怕且都要十萬八千里先得。

  舊時,以「雷公」等神佛去震懾壞人,係維持社會治安嘅方式,法治文明未曾普及嘅時代,起好大作用。而家科學昌明,個個都知呢個世界上冇雷公,而法治又未曾完全實施得到,盜賊如毛,騙徒無數,偷搶電話、入屋爆竊、老千天仙局屢見不鮮,更弊嘅係,有毒食物多過正常食物,究竟社會係進步咗抑或退步咗?



  除咗神佛,查實廣府人對雷電嘅研究亦有科學一面,例如用雷電預測天氣,有一首農諺:

東攝雨淙淙,西攝曬蝦公。

南攝攝三夜,北攝雨就射。

意思好明顯,就係從攝爧(閃電)嘅方向去預測未來嘅天氣:東方攝就將會雨落連綿,西方攝就將會日光遍照,南方攝就會猛攝數日,北方攝就……連個天都要冧落嚟咁大鑊。


趁住雨季,不妨觀察下有冇咁嘅規律,睇下先輩智慧慧係咪眞係咁靈擎。

最新評論

手機版|Archiver|粵語協會    

GMT+8, 2017-11-19 16:29 , Processed in 0.055780 second(s), 22 queries .

Copyright © 2003 - 2016 Cantonese Association. All Rights Reserved. 粵語協會 版權所有

返回頂部