廣東人嘅大地恩情
雄壯嘅伴奏音樂之下，一望無際嘅農田、蜿蜒嘅河流、肥沃嘅桑基魚塘、辛勤耕作嘅農民、嬉戲嘅細路仔，跟住一把渾厚嘅聲音唱出“河水彎又彎，冷然說憂患”……呢個就係電視劇集《大地恩情之家在珠江》嘅片頭畫面。
八十年代初，呢部取景自當時中山縣嘅電視劇轟動一時，其中嘅珠三角鄉土情懷，感動咗無數廣東人。電視劇嘅同名主題曲，更成為永恆經典，時至二十幾年後嘅今日都經常被重新演唱。呢首歌廣受歡迎，並非靠沾電視劇嘅光，更主要嘅係佢本身就係一首驚世之作，作曲家黎小田同填詞大師盧國沾功不可沒。
清末民初，大批華人被「賣豬仔」去到美國舊金山，嗰種「別我鄉里時，眼淚一串濕衣衫」嘅悲痛之情，今日搭飛機出國留學嘅富家子弟又點可以體會到呢？當時嘅「豬仔」，生命係幾咁賤，即使捱得過幾個月暗無天日海船底艙生活到達傳說中「金山」，亦難頂得住日以繼夜牛馬不如嘅「孤哩」生活。今日穿金戴銀衣錦還鄉嘅歸國華僑，有冇忘記佢哋嘅祖輩創業嘅血汗史呢？
螻蟻尚且歸群，更何況有感情嘅人呢！「若有輕舟強渡，有朝必定再返。水漲水退，難免起落數番。……夢裏依稀，滿地青翠，但我鬢上已斑斑。」漂洋過海打工嘅華人，必定日日喺海邊望住自己家鄉嘅方向，對住漲落嘅海水，等待返家嘅船隻。佢哋嘅根喺中國呢片土地，就算無緣返家，亦會經常夢見自己嘅鄉下，見到佢哋嘅下一代喺呢片華夏土地上成長。但不知不覺，自己已經離鄉多年，年華老去……好有賀知章《回鄉偶書》“少小離家老大回，鄉音無改鬢毛衰”嘅感覺。
有樣嘢要順帶講下，有人以為《大地恩情》嘅演唱者係張學友，其實只係一個美麗嘅誤會。只因八四張學友喺十九區業餘歌唱大賽憑此曲獲得第一，所以畀人錯誤嘅印象。實際上，呢首歌嘅原唱係有電視劇主題曲歌王之稱嘅關正傑。
本文版權屬於粵語協會，轉載務必註明出處
