一秒朋友，一世朋友
朋友/我當你一秒朋友/朋友/我當你一世朋友
奇怪/過去再不堪回首/懷緬/時時其實還有
忽然諗起某個好耐冇來往過嘅朋友，腦裏閃過當日交往嘅零碎歡樂片段，不由得嘴角帶笑……曾經日日共對如糖黐豆嘅兒時好友，今日卻音訊隔絕，即使街上踫見，可能亦形同陌路，不禁令人唏噓，唔知對方有冇偶然記起我呢？
朋友/你試過將我營救/朋友/你試過把我批鬥
無法/再與你交心聯手/畢竟難得有過最佳損友
從前共你/促膝把酒傾通宵都不夠/我有痛快過你有沒有
……
命運決定了/以後再沒法聚頭/但說過去/卻那樣厚
陳奕迅嘅呢首《最佳損友》，並冇如譚校長當年嘅金曲《朋友》噉單純歌頌偉大嘅友情，而係從另一個角度去探討朋友嘅含義——朋友，未必系永远嘅。
我係一個鍾意懷舊嘅人，睡夢，舊照，通訊錄，抑或故物書信，都可以令我記起某位曾經嘅好友，隨之亦勾起一段回憶。喺我人生歷程中，有過好多好朋友，但隨住時間推移，因為各種原因，好多昔日嘅好友已經唔再係好友：或因距離而分開；或因一次爭吵而勢不兩立；或價值觀有異而逐漸疏遠；或因生活圈子不同而疏離……
為何舊知己在最後變不到老友？又為何來年陌生的是昨日最親的某某？當日曾經親密無間，無所不談嘅戀人，分手數年後相見，竟然無話可講；當日曾經同甘共苦，「著埋一條底褲」嘅兄弟，反目成仇，老死不相往來，都難免使人有窩心嘅痛。但係，呢啲都係命運嘅安排，與其惋惜，不如珍惜。
總好於那日我沒有/沒有/遇過某某
珍惜現在嘅友情，亦珍惜過咗去而長留於心中嘅友情。既然一夜夫妻可以百夜恩，點解一秒朋友唔可以一世記心頭呢？如果當日冇遇見過佢，可能你生命裏亦少咗一段如璀璨繁星般嘅美好回憶。畢竟，某人能夠成為自己朋友，同自己一齊走過生命中嘅一段路，已經係一種緣分。
本文版權屬於粵語協會，轉載務必註明出處
