如果嚟我度買豬肉敢畀假銀紙，我就同佢死過！——G肉佬
　　今日好唔開心，哎！賣一斤豬肉我先賺嗰兩三蚊，有時豬肉升價，少人買，可能企足成日都冇做到幾單生意，點解重有人畀假銀紙？嗰啲人真系無良！
　　今朝有條四眼仔嚟買豬肉，見佢高高大大，有米八幾，個樣幾斯文嘅，佢話稱兩斤豬展肉。我切豬肉次次都好准稱，嗱嗱臨切好，過鎊一稱，啱啱兩斤。
　　“廿四蚊啊，唔該！”
　　條友好似有啲發吽哣，望住個稱，好耐先反應過嚟，遞咗張五十蚊畀我。我一攞係手就知係假嘢，要佢畀過張，條友話我冇驗鈔機，死話係堅嘢。好！我就陪你顛吓，問咗隔籬雞蛋檔卿姐借咗個驗鈔機，一驗，假嘢！條友唔忿，死話係我換咗張假嘅冤枉佢。條死人四眼仔，似住高大，以為我唔係佢手腳，重大大聲話睇住我換咖噉。
　　我哋啲街市佬冇咩文化，又好鬼牛精咖嘛，條友又唔停聲係噉講喔！哇，呵撈吔！我嬲得滯攞住把豬肉刀一刀（唔使驚，唔係劈落人度）劈到個砧（好厚嘅）板分成兩邊，張豬肉枱係噉振，條友見到噉驚到飆尿，掉低嚿豬展，連張假銀紙都冇攞返就走咗。
　　市場啲人都好耐冇見過我發火，見到我噉都當堂靜曬，好耐都冇人敢出聲。哎，可憐我個砧板，靚嘢嚟嘅，陪咗我五年有多啦。最衰個死人四眼仔，正一斯文敗類！畀假銀紙重要話係我冤枉佢，佢肯定以為我後生好呃啦，哼！區區一張假銀紙就想混水摸魚，都唔知我細細個就係呢個市場度學嘢，唔通重未見過大蛇屙屎咩！
　　我哋啲做小本生意嘅，已經唔奢望發達，淨係求兩餐食得好啲，唔係噉都唔得吓哇。fficeffice" />

[此帖子已經被monfan於2007-6-6 14:07:50編輯過]