周不時見電燈柱上貼住咩“老中醫專治皮膚病”，但廣州嘅皮膚病睇嚟唔係嗰啲老中醫可以醫得好嘅。——G肉佬fficeffice" />

每日到咗收檔嗰時，個人就攰到好似散咗噉。今日都唔例外，收檔就成條喪屍噉飄返屋企。

熱天日頭長，個天冇點黑，但都好晏了。返到屋企門口睇都唔睇就插條鎖匙入門，但平時鎖匙窿嘅位置好似消失咗噉，插嚟插去都插唔入。舊樓嘅光線差，用手機照吓，小喇叭！鎖匙窿嘅位置畀人貼咗張“牛皮癬”，又係咩通坑渠嘅！好在黐得唔係好實，我撕咗出嚟，入到門踩到啲嘢，原嚟又係咩幫人送煤氣嘅優惠卡同超市嗰啲傳單。睇樣係門罅攝入嚟嘅，真係忍無可忍，於是我攞起嗰張通坑渠嘅“牛皮癬”，打通咗個電話，聽到有人“喂”，於是我吸啖氣，然後大叫一聲：“蒲你阿麽！”跟住立即收線。

其實呢啲“牛皮癬”已經貼勻呢區嘅舊樓，因為唔係咩“小區管理”，冇保安管，嗰啲死人頭锺意就貼幾張，貼到外牆、樓梯、信箱、地下……周圍都係！但貼住鎖匙窿咁有創意嘅，我都係第一次見。電燈柱、人行道、車站呢啲都已經係“牛皮癬”嘅天下喇，點知啲冚家祥連我屋企棟門都唔放過！

有時喺車站等車，會見有啲人鬼鬼祟祟兩頭望，然後手掌係車站牌度一拍，又黐好一張！難為嗰啲環衛工人，鏟成日都鏟唔乾淨。唔知佢哋嬲起上嚟會唔會好似我噉，打電話去蒲人哋阿麽呢？

[此帖子已經被作者於2007-7-5 16:47:41編輯過]