啱同姑姑、表妹、阿媽一行四人去咗國際大酒店（就係謝晉導演過世嗰間酒店）BUFFET返黎。。。成班人從5點半開始B到7點半。兩個鐘喺同一個地方食嘢傾偈，認真食到眼瞓，其實至緊要係我同表妹兩位後輩對兩位長輩傾嘅話題一啲都冇興趣，所以一直就坐喺度食嘢。。。食啊食啊。。。一個鐘之後就開始眼瞓。。。檯面上擺出嚟嘅美食基本上都畀我哋一一掂過晒。。。唉。。實在無計啊！身為5星級酒店，個BUFFET餐廳竟然冇背景音樂，搞到我一路聽住兩位嘅教導，一路就係想快啲食完就走。。。但係卒之都係食咗兩個鐘先走得！

今日冬至，朝早全家人拜咗祖宗返黎，冷空氣又跟到！降溫降咗9度，西北風吹啊吹，凍鬼到死噉！返到屋企，挐挐聲加多件衫，唔係又會凍親感冒添。。。噉就大劑喇！家陣出面又風又雨，好似又有啲落緊冰雹（唔鬼知係冰雹定雪籽）。。。聽氣象預報講，聽日會去到零下四度。。。唉~~~~~決定！——暖寶寶（暖腳）+熱水袋（暖手）+熱空調（暖身）！！！