本來唔想寫喺網上，不過我諗呢處同日記本都差得唔多，因為周圍冇人識得嚟呢度睇我寫啲乜。。。

幾日嚟，心情差唔多經已係跌咗入低谷，只怕再過多幾日，我會唔記得點去笑（係發自內心嘅笑），可能會出現更加嚴重嘅後果。。。其實噉樣嘅心情唔係第一次出現架喇，1年前有過，2年前有過，6年之前都有過。。。。現實嘅黑暗唔使再提，每次提起就覺得心裡一片漆黑，睇唔到任何嘢。。。

今日有個網友都同我話“呢個世界唔係你可以想象嘅。。。”，雖然我亦都知道呢個係不爭嘅事實，但見人時不時噉講心依然鎮痛！尤其係自己親身經歷到。。。

自細生活喺咁純嘅空間，而家卻要面對噉嘅現實，覺得好似如夢初醒，所有嘅一切都變得好陌生。。。我係咪唔應該存在於呢個世上呢？定係我根本就唔應該嚟到呢個世界？諗極都諗唔明。。。以前一直覺得對內做好自己、不斷提升自己嘅修為就OK，對外做事對得住人、做人對得住自己嘅良心就OK，但係事實話我知——冇用！而家重累埋身邊嘅人，睇得出大家都好關心我，所以話：我係幸福嘅，呢一點毋庸置疑！但係若果真係需要有人承受噉嘅結果，我一個人承受咪得囉，點解重要累埋其他人呢？睇住自己關愛嘅人受罪比自己受罪更加痛苦同埋受煎熬！唔知係咪真係“善有善報，惡有惡報”嘅？見到啲惡人笑，我就會打冷震。。。

可能有一日，我真係會唔識點笑；可能有一日，我會唔記得自己係個點樣嘅人；可能有一日我會得失憶症；可能。。。太多可能。。。。對於咁多嘅可能，我除咗守住自己個心重可以做得乜？若果真係要出賣自己個心先可以達到某啲願望，噉我寧願放棄，因為我體會得好清楚，畀人欺騙畀人出賣嘅感受係點。。。。希望一切都會過去。。。就算呢條路係絕路，都希望絕嘅得係我一個，唔會係第個。不過只要有一絲可能，我就要自己行返條路出嚟！