為阿爸留低一篇紀念頁，恭喜佢順利通過今年嘅司法考試！

前一牌，一直關注緊今年考試出成績嘅日子。終於，琴日睇到司法部通知，話今朝8時開始可以查。唔知點解，琴晚有少少緊張，同阿笑傾咗幾句之後我同佢講我要睇部電影嚟緩解吓情緒，於是睇咗一出好耐之前DOWN咗嘅《追影》。今朝九點一起身，依舊係周末嘅例公事，洗衫，打掃屋企，清理鼠盆。。。因為下午要返司法局開會，所以嗱嗱聲朝早做完家務。。。。其實一路又掛住另外件事嘅──唔知班友戰果點呢？不過唯有等佢哋電話啦。。。

10點幾，手機鈴聲響起，一睇係阿爸嘅，突然有種好好嘅預感，接起電話，果然！傳嚟阿媽嘅歡呼聲，“靜靜，你老爸通過啦！”我一時之間唔知講乜好，回報以一聲開心嘅笑。。。。其實嗰時究竟係笑定係想喊自己都唔清楚。。。之後阿爸嗰把溫柔嘅聲喺耳邊響起，聽得出佢好開心，佢一路喺度微笑，一路反覆道“真是想不到，想不到阿”

講真，我從來都唔懷疑阿爸嘅IQ，自細佢畀我印象就係一個好聰明、好有責任心嘅人，只要佢想做就一定要成功。雖然佢不善言辭，唔鍾意多講嘢，唔係幾識氹人開心（對我例外），不過就係因為噉，我先覺得佢畀到我好大嘅動力，佢一直係我學習嘅榜樣！佢做嘢時認真同投入嘅態度，若果你企喺佢身邊你一定會畀佢感染到。阿爸話過佢細個時嘅理想係當一名科學家，但係因為時代同屋企背景，佢最終都係做唔到，佢話佢讀書基本上都係自學。阿爸鍾意科學，所以佢對理科啲嘢好醒，對啲先進科技都好有興趣去研究。佢又好鍾法律，自學讀完法律本科之後，又話要試過司法考試，其實好多人都勸佢年紀唔細而且又係工作緊，冇咁多時間，唔好再咁搏喇。佢之前都有猶豫過，但係卒之佢都係要試下。前幾個月，我每次返去，佢都匿喺書房埋書，起早捱夜。。。。見佢咁勞力費神，真係有啲唔忍心，但係又唔好去打攪佢。

諗返起舊年嗰場，似一切歷歷在目。司法考試──中國第一考，唔知有幾多法律學子在此跌倒，為之瘋狂，因為呢個考試考驗嘅唔單之係記憶力、理解力、判斷力同閱讀速度，重考驗埋一個人嘅毅力同埋勇氣。而家事實證明，佢嘅付出係值得嘅！

阿爸，你係得嘅！你永遠係我嘅榜樣，以你為榮！

2009.11.21