拉丁化粵文嘅探索之路

 

 

相對於臺民族150年嘅民族語文積澱嚟講，我哋粵民族喺歷史上嘅民族語文積累可謂少得可憐，甚至連“粵文”呢個稱謂都係近年先至興起嘅，可以話，我哋粵民族係一個冇乜母語語文歷史傳承嘅民族，呢樣嘢係我哋粵民族嘅一個悲哀。

 

之但係噉，我哋去睇每一樣事物都總係會有一個視角嘅考量，以唔同嘅視角去睇同一樣嘢，會有截然唔同感受。冇歷史傳承可以令人好自卑沮喪，但同樣可以令人徹底拋棄歷史嘅包袱，無所顧慮噉喺一張白紙上高書寫自己宏偉嘅篇章。

 

粵文係一樣誕生無耐嘅新新事物，佢嘅成長，將會伴隨著我哋粵民族嘅民族覺醒之路不斷前行！

 

現時當代粵文創作嘅載體唔一定非以華字（包括正簡）為尊，拉丁化嘅拼音文字亦都係可資探索嘅另一條道路。

 

越南喺本土文字拉丁化之前，就有成五百幾年嘅民族語文積澱（喃字文學），但係噉一樣無阻越南人變革自己民族文字傳承嘅決心！

 

同越南相比，我哋大粵母語語文拉丁化嘅歷史包袱顯然要比佢哋細得多，我哋真係冇必要喺粵文成長之初就完全封殺行拉丁（羅馬）化呢條道路。