禽日中午，樓下後巷行人稀疏，出奇咁靜。
　　正當我一路上網一路享受嗰份難得嘅安靜，突然畀一把唔和諧嘅聲音攻入我耳膜：“磨菜刀剪刀……”，過咗幾秒又嚟一嘢，同之前完全相同嘅內容，不過今次大聲咗——應該係距離近咗。我出陽臺望落去，有條粉腸踩住部小型三輪車過緊嚟，車尾放住幾個麻包袋，車頭裝咗個高音喇叭，正話啲咁乞人憎嘅聲音肯定出自嗰個錄定音嘅喇叭。一個山旮旯出嚟嘅外江佬，又點會知道騷擾人休息係一種極唔道德嘅行爲呢？算啦，慳返殼水，我攞咗手上準備潑落去嗰殼水去淋花。
　　磨刀佬部車終於遠去，我耳根清淨返好多，一路淋花一路諗返起細個嗰陣嘅收買佬叫買聲：
　　最普遍嘅就係“收買爛嘢——”，而家啲收買佬重剩返幾多本地人？重有幾個知道“嘢”字係咩意思？
　　“收買爛銅爛鐵爛‘hai’煲”，
　　“收買爛‘膠’鞋”，
　　“收買書‘主’報‘主’‘主’皮箱”。
　　當時幾乎所有收買佬都係本地人（佛山人），佢哋嘅佛山話發音令到“銻”變“hai”，“紙”變“主”，加之“爛‘hai’煲”同“爛‘膠’鞋”都極似粗口，所以我對呢幾句都好深印象。重記得嗰陣成日問老竇點解啲收買佬成日講粗口。
　　除咗收買佬之外，八十年代嘅街頭重成日聽到“倒水——”嘅聲音。八零前出世嘅人都應該知道，所謂“倒水”，其實係“倒尿”。當時佛山城區面積好細，行幾步就到農村，農田需要大量肥料，農民自己嘅當然唔夠啦，所以要周街“求肥”。嗰陣時，只要你聽到“倒水”之聲，行出去睇，就會見到有個阿伯或者阿耄推主部大板車，又或者踩住部三輪車，車上有幾個木桶，就係傳說中嘅“水桶”。雖然佢哋做緊嘅嘢似乎好唔乾淨，但佢哋嘅聲音好柔和，唔單止唔會令人反感，重有啲似唱歌，聽落有種莫名嘅親切感添。
　　到咗今日，所有農田都變晒高樓馬路，當日嘅農民全部上晒岸，佢哋唔會再“倒水”，因爲佢哋經已賣地賣到好“沓水”，佢哋唔會推住部水車通解叫，只會揸住部進口車等遊車河。二十年光景，呢個城市多咗無數繁榮，卻少咗份寧靜；多咗批外來人口，少咗份本土特色；多咗份細故，少咗份純樸；多咗份隔膜，少咗份親切感。