呢排身邊發生咗好多事，有啲係關乎自己，有啲係關乎屋企，深切感受到世態炎涼，命運難測。

人活喺呢個世上，有太多嘅不得已，有太多嘅不情願……做人嘅底線真係會喺不知不覺中一路噉降低、降低、再降低？噉呢個世上重有幾多人係稱得上真正意義上嘅人？重有幾多人做嘅事係真正意義上人做嘅事？

哭笑也罷，點解開心嘅時刻永遠都係咁短暫？喜歡嘅事物永遠都係咁遙遠？而人就永遠都似存在於一個唔屬於自己嘅空間度？

若果人人都可以控制到自己要行嘅路，就唔使提命運；若果事事都可以預料到後果會點，就唔使論天意。可怕嘅係，人想控制自己嘅命運而天意卻又要弄人。

可憐嘅人，你行錯咗路咩？使唔使返轉頭？——唔返，唔可以做到流芳百世，就要遺臭萬年；一係——係喎，懸崖勒馬，重嚟得彻嘅！

無錯，路係自己揀，命係自己玩，邊個理得我？就算而家我要結束自己嘅生命，話晒都冇人可以干涉。我可以聽取人哋嘅意見，但呢個係我嘅自由，如果我決心唔聽，邊個都迫唔到我。但係，偏偏，人呢，又有咁多顧慮——又想有自由，又擺脫唔到周圍影響，所以到最後都係做咗違心事，真正堅持到底嘅屈指可數。

又有句說話叫“既來之，則安之”，其實都係一種好無奈嘅心理狀態，講呢句說話嘅人唔係唔想去控制一切、操縱一切，而係有心無力時藉以自我安慰嘅啫！唔係佢真係想“安之”，而係唔“安之”唔得，即係冇得揀。

有人話齋：人既然冇權選擇自己嘅生，都冇權選擇自己嘅死。所以人自一出世就注定一路都係冇得揀。

唔好以為，今日喺超市揀咗啲生果就以為自己有好大嘅權利；唔好以為，今日做咗想做嘅事，講咗想講嘅說話，就以為自己做人好瀟灑，世界幾美好……

係“生喺福中不知福”好啲呢？定係猛噉用精神安慰劑，似阿Q咁樣好啲呢？有人揀咗前邊，有人揀咗後邊，相信——無論揀咗邊樣，都係因為“冇得揀”……