上次講「博屌」，意猶未盡，唯有加篇，以博——衆人一閱。
　　首先，好有必要討論下用字。點解要用「博」，而唔係「搏」呢？「博」係「博取，獲得」，而「搏」係「搏命，盡力」。顯而易見，「博屌」方為正寫，而「搏屌」則好難解得通，莫非要理解成「搏命屌」？至於「駁屌」，就係你「博屌」成功後反駁返「屌」你嘅人。
　　其實，「博屌」重有個同義詞，叫做「屎窟痕」。何解？因為同性戀者，以肛交為樂，「屎窟痕」即係想畀人X，頗為形象。該詞意思較之「博屌」隱晦，不過帶有更多不文色彩。
　　另外，可能有人會諗到「抵屌」同「嘍屌」兩詞，認為亦屬同義詞。其實，三者係有分別嘅：
　　所謂「抵屌」，即指某種行為或說話值得畀人鬧，但主事者本身唔願意畀人鬧。例如強姦、搶劫、殺人、放火呢啲，都係「抵屌」嘅罪惡行為，但犯罪者根本唔想引人注意，而「博屌」者，係申請畀人鬧。亦可以噉理解，「博屌」係主事者嘅動作，係一個動詞；而「抵屌」係描述人或事嘅性質，係形容詞。
　　至於「嘍屌」，雖然亦係動詞，但佢強調互動性。「博屌」係引人鬧，被鬧者未必會反駁，而「嘍屌」，則係嘍人對屌，即係「搵交嚟嗌」。
　　再次聲明，寫此文絕非「博屌」，而係「博讚」。

copyright：本文版權屬於粵語協會