時值清明，各地民衆皆有活動，諸如插柳、踏青等，而掃墓則至為緊要。所謂掃墓，即掃亁淨墓碑，拜祭先人，以示尊敬，籍此紀念。
舊時殮葬先人，大多爲土葬，且墓穴依山而建，務求居高臨下，位置則須經有道之人多番挑選。所謂「家山有福」，祖先山墳若然風水正，可庇蔭子孫。但凡清明掃墓拜祭祖先，九成九都要行上山，此爲「拜山」之由來。
講開「拜山」，有句俗語頗為費解。若然有人說話又長又譖又冇癮，聽者或趕時間，或嫌其煩，想佢收聲，則會講「有嘢留返拜山先講！」有說話何解要留待拜山？坊間有幾說： 其一，此句說話奉勸以肺講嘢（即講廢話）者「勿虛耗他人光陰，要講就留待拜山時同死去之先人講到夠，皆因死人最得閑，望都望有人陪佢傾耐啲。」 其二，所謂「唔過年都要過清明」，每年拜山，往往係家族最齊人之時。孝子賢孫既可拜祭先人，亦可與家族長者及宗族兄弟團聚交流，濟濟一堂，何其熱鬧。有何家族事務，敘舊問候說話，趁人齊時講就最啱。故此，引出「平時唔好嘥口水講，留返拜山先講」之説。 其三，傳說拜山時說話百無禁忌。所以有平時不便開口之事或忌諱話題，不妨留待拜山先講，必定「醜嘅唔靈好嘅靈」！ 其四，「廢話」又謔稱「鬼話」，顧名思義，即講予鬼聽之話。掃墓拜祭之地，靈氣重且鬼多，故「留返拜山講」隱含「搵鬼聽你講嘢」之意思。
以上解釋，斷估成分甚重，尤其三、四兩說，似搞笑多過堅料。實情係咁：三合會背語中，「拜山」即「探監」。假設某蠱惑仔被捕時，仍雞啄唔斷與社團兄弟交談互通，阿Sir難免不耐煩，順口對其他人爆出一句「有咩留返拜山先講啦！」潛臺詞爲「你兄弟衰硬，實要入冊，而家唔好阻住阿Sir我收工，有嘢留返探佢監先慢慢講」。對照此場景，成句話即時解通晒。 囉囉嗦嗦，講咗咁多，不如唱首歌。詞神Samkong當年借秋官〈天涯孤客〉旋律，作咗首〈靜待天光〉，堪稱清明應節首選：
霧密陰森掃墓忙 咪立亂衝撞 後山濕滑 靈精隱藏 魂魄四處蕩 遇啱清明時節到來 陣象也夠旺 拜祭孝道 敬祖先世代名望 追憶景仰前塵盛世 須銘記 莫要遺忘
獻上那美酒香冥人潮似浪 怎抵擋 餓狼及惡鬼使你心驚慌 遍地吊靴馬面牛頭 古怪形狀 雨夜更感覺是仿徨 張眼望
啊——山谷窄路見燈影 似導航 靜待天光 靜待天光...... |
Powered by Discuz! X3.5 Licensed
© 2001-2024 Discuz! Team.
