「一個語種的死亡和消失，等於永遠失去我們對人類思想的認知和理解的不可替代的一部分。」──摘自聯合國教科文組織公佈的《世界瀕臨消失的語種版圖》報告。
由出世嘅第一日開始，我哋就身處喺一個粵語嘅環境：屋企人同我哋講粵語，周圍嘅電視、媒體講粵語，身邊嘅朋友、同事講粵語……我哋嘅成長離唔開呢種語言。粵語係我哋嘅母語，亦係一種優秀嘅漢語，喺粵語面臨懶音同推普大潮衝擊而日漸變味嘅今日，越嚟越多人開始深思方言保護同埋重振嘅問題。
一直以嚟，香港有唔少官方組織嘅粵語研究機構同埋網站，外國亦有唔少組織或者個人製作嘅粵語網頁，唯獨國內相對缺少官方嘅研究機構，喺粵語嘅發祥地缺乏研究粵語嘅組織唔可以話唔係一個遺憾。可喜嘅係，近呢幾年，喺廣東省有越嚟越多粵語愛好者同埋粵語專家，都陸續做咗同粵語有關嘅網站或者個人網頁，有好多都好受歡迎，瀏覽嘅人數非常多。無論喺國內抑或喺國外，學習、接觸粵語嘅人都越嚟越多，見到粵語噉嘅前景，我哋都覺得好開心。粵語協會將好幾個大型嘅粵語網站聯合起嚟，成立咗呢個粵語同盟組織。
創立粵語協會嘅目的就係希望將所有人力、資源集中埋一齊，形成一股力量，保護及弘揚以粵語為中心的粵文化。下面係粵語協會嘅幾點宗旨：
1. 規範粵語字嘅讀音，既強烈反對讀懶音，亦反對受其它語言影響嘅錯音。
2. 規範粵語字寫法，努力糾正目前社會各媒體亂用粵語字嘅情況。本網粵語成文一般用正字，而唔主張用本字。
3. 規範粵語文法，等粵語可以順利成文。
4. 推廣、講解粵語用字、用詞同埋文法知識，力求令到更多學習者利用粵語交流。
5. 弘揚嶺南文化，積極推廣廣東優秀嘅文化傳統同埋文化遺產，等世界上更多人認識呢種優秀嘅華夏文化分支。
6. 提供一個環境良好嘅交流空間，使有問題嘅朋友隨時發問並得到滿意嘅解答；使各位粵語專家喺度搵到更多知音人；使我哋可以吸納到更多有料之人，攜手合作，建立全球華人社區最大嘅粵語網站。
最後，需要講明呢一點，粵語協會嘅創立同埋網頁、論壇嘅推出，完全係爲咗研究粵語文化。本會絕對唔會參與各種因爲地域語言問題所引起嘅爭論同埋涉及政治嘅問題，希望各位熱愛粵語嘅朋友同我哋一齊創造一個和諧穩定嘅環境啦。
本文版權屬於粵語協會，轉載務必註明出處 | 