奸人語錄
真係有型，天生硬朗無情，幾多好漢為美人，無財又無丁①。
一二三四五六七八，我的姑娘在哪裡？一二三四五六七八，我的姑娘在哪裡？
有恩不報未算差，有仇不報正傻瓜。
以和為貴，遲早乞米②。三十六着，恃强淩弱。
損人必利己，打贏靠暗器。
一二三，五六七，我的仇人在哪裡？我的仇人，一二三四，我的仇人在哪裡？
你識做，我識做。
咁大條鍊，咁細隻手指公。唉… 你有乜做得成功。
何有富，我要你不得好死，死無全屍，沉落海底，畀魚蝦蟹食晒，食唔晒沖返上岸畀狗食，畀狗食唔晒畀雀食，海浪食晒你哋。
我浪子美男計上計，打孖噉上，有邊個女人唔死喺我手上。
我預咗畀雷劈，但係喺我畀雷劈之前，邊個睇我唔順眼，我就要佢陪葬。由今日開始我唔姓何，我姓奸，我係奸人堅。
一件污 兩件穢 三件冇所謂
女人就係咁簡單，佢鍾意你你放篤屁，佢話你好有男人味。
人財兩得 唔使鹹濕
係，我係奸人堅，但我奸得堂堂正正，光明磊落，我行得奸，企得奸！
貓捉老鼠，隻老鼠死咗，噉隻貓玩乜啫？我要慢慢玩殘你。
損人不利己，不如跳井死。
我要做奸人，可以被毀滅，但唔會畀你打敗。
你依家受我一拜，你就係一代宗師，你依家唔受，你就係一個乞嚏。
咁戇居，你好學唔學，點解要死呀？死嘅時候，死會嚟搵你，你去搵佢？
得閒奸一奸，大病都好返。
噉而家做黃飛鴻徒弟，真係咁多着數，係人都知啦。正所謂人間有情，你未死就送你一程③。
我哋啲奸人呢，聰明人就怕我。係啲笨人蠢人先會信我嘅啫。
一個純情嘅少女忽然間發姣，真係一個謎。
女人過咗六十斤，男女授受不親。
一二三四 冇嚟貴格 一睇就知冇仔生 一二三四 嘴歪歪 一睇就知睇唔到嘢 一二三四着西裝 我阿爹係着唐裝
我哋呢啲浪子，係唔會等女人，只有女人等我。
我哋呢啲浪子，係唔會去搵阿爹，只會阿爹嚟搵我。
人哋扮靚係越扮越靚，唔係越扮越攞命吖嘛！一篤牛屎插朵花，始終都係一篤牛屎，你明唔明呀？④
一條死魚掉返落海，噉佢始終係一條死魚吖嘛，點解你唔接受自己就係一條死魚呢？
你係醜，但醜係無罪家嘛，但係唔知醜就罪大惡極喎。
女人唔係雞屎鴨屎，就係豬屎啦，我話你牛屎，講緊你係最高級喎。
真牙人妒忌假牙人，聞所未聞。
牙死不能復生吖，牙牙相報何時了呢⑤？
嘩，憑你副尊容都想做明星呀？拍昆蟲紀錄片吖。
古語有云：嘢可以亂食，禮物唔好嫌多⑥。
人刺青你刺青，你刺隻雞係條腰度，你做咩咁鍾意食雞腰呀？
寧可信其有，信咗唔使憂
我話你聽，一個人唔好咁好功夫，你越好功夫呢就越鹹濕。
一睇我哋就係苦命駌鴦一雙雙。
有人睇到就黃飛鴻，冇人睇到就一條蟲。
人生出嚟，就為咗自己嘅利益生存。有著數就正義原則，無著數就乜都掉得，呢個世界唔係噉嘅咩？
師父，我諗我明啦，總之呢打不還口，罵不還手，買餸呀唔打斧頭。
我啲噉嘅底，正所謂冇人冇物冇山頭，唔好話做英雄，做灰熊都唔得啦。
鬼腳七用隻腳嚟諗嘢嘅⑦，弊在佢隻腳係跛個噃。
做阿媽已經難，做老舉阿媽更加難⑧，我覺得你應該好好孝順你阿媽至啱
唔好愛上一個做大事嘅人。
兒女私情，與其拖泥帶水，不如一刀兩斷。
瞓咗靚過未瞓，呢啲係我哋廣東菜嘅特色。
切忌喺啲細嘅面前失威，你啱啱敷少少藥嗌到好似女人生仔噉，你話幾丟架。
你冇防範意識嘅，隨便就走出街畀人劈，劈到好似豬肉噉，你不如去豬肉檔做豬肉啦！
唔可以多謝啲細嘅，啲細嘅係乜嘢呀！
大老闆，我哋啲細嘅無非求一個機會，若然大老闆畀一個機會我，我一定唔會令你失望。
我咁辛苦捉你哋返嚟放咗你哋，我不如食飽飯去扣喉吖。
你夠膽嚟我舖頭點燈，我就響你門口點火。
哨牙就唔同喇，又易認，又搶眼，離遠都見得到，唔見咗又容易搵返。
點評：
① 「丁」係指人，「冇財又冇丁」，即人財兩空！
② 米係主要糧食，因此「乞食」廣州話又叫「乞米」。
③ 「送人一程」，廣州話除咗有「送行」之意，另一個意思表示「送人去死」，係「殺人」嘅委婉講法。
④ 廣東俗語「一朵鮮花插喺牛糞上」，意思係「美女配臭男」。
⑤ 巧改自「嘢可以亂食，說話唔可以亂講」。
⑥ 配合劇中哨牙妹形象，巧改自「冤冤相報何時了」。
⑦ 話人冇腦，通常可以話人用××諗嘢，××可以指人體嘅其它器官，例如pet pet、肚，等。
⑧ 「老舉」唔係「老舉人」，而係「妓女」，慎用！
本文版權屬於粵語協會，轉載務必註明出處 | 