你怕我怕個個怕/煙加酒加屋租加/巴士加的士加/多士芝士乜都加、加、加加加加/糖又加/鹽又加/成日咁加任佢話……
睇完呢段話，唔少人會以為某個廣州市民嘅說話畀偷聽緊廣州嘅阿展記低咗。其實呢段加價牢騷出自平民歌神許冠傑79年嘅《加價熱潮》歌詞，估唔到呢首30年前唱到街知巷聞嘅地道粵語歌，喺CPI飛漲嘅今日，依然適用：
牛油又加/蠔油又加/燃油又話每卡七個六/其實無他/佢石油多到極/可惜真金白銀貶晒值/冇法喇/冇法喇/要加就加/都由佢啦……
目前升價最犀利嘅係屋租樓價、氣油，同埋柴米油鹽呢啲生活必須品，全部都喺歌詞裏面反映晒出嚟。最有趣之處，就係歌詞作者之一黎彼得講過，當年寫詞嘅時候，只係為咗協音同壓韻而寫咗「燃油又話每卡七個六」呢句，但勢估唔到首歌推出嘅時候，燃油真係啱啱升到去呢個價位，真係天意整定首歌成功。如果今日要唱，只需要改成「柴油又話每升七個六」就fit晒，睇下啲車喺加油站外排隊輪油嘅境況，睇怕油價唔使幾耐就會「同國際進一步接軌」升到上七個六！
貨幣貶值，物價無止飆升，老百姓褲頭帶勒得越嚟越緊，生活一日比一日困難！面對呢個加價熱潮，受害最深嘅小市民又可以點呢？我哋除咗可以發出「冇法喇，要加就加，都由佢喇」嘅無奈慨嘆，都重可以發白日夢，幻想下嘅：
時時話加/年年話加/無盡咁加趕到絕/求助哪咤/我望能生對翼/即刻飛上月球再揾過食/就冇有怕/冇有怕/佢加就加/拜拜喇！
現實世界中，當然唔會有哪咤或者其他神仙出現，我哋只能靠自己。不妨聽下呢首《加價熱潮》，體會下其中嘅苦中作樂精神，相信過咗呢個經濟難關，加價熱潮就會變成加薪熱潮！
本文版權屬於粵語協會，轉載務必註明出處 | 