嗰日朝頭早一返到辦公室，就聽到個同事自然自語：「晨七咁早就返嚟喇？」我即時話：「重差兩分鐘就夠鐘喇，重話早？」同事即時一面茫然。我行近一睇，先見到佢檯面擺住張報紙，上面寫住「神舟七號將於今天返回……」原來一場誤會。
粵語嘅「晨七咁早」同「蒙七咁早」都係表示朝早好早嘅時間，而且早到有啲令人難以接受。粗俗少少嘅講法重有「倒尿咁早」，因為以前嘅「倒尿公」未天光就要開工收集人肥。查實，「七」字重可以搭配出好多意思：
今朝「蒙七咁早」我就踩住部「錢七」（破單車）去返工，經過間「七仔」（七十一便利店），見到門口圍咗班人，場面「七國咁亂」（混亂）。有熱閙睇，「依撈七」（必定）都入去睇下。原來有兩個「墨七」（小偷）偷嘢畀人捉住，佢哋慌死畀人打，跪晒落地求情喊到「七情上面」。呢個時候，旁邊有個「三唔識七」（完全不認識的）嘅阿伯喺度自然自語：「捉到呢啲死賊仔，「唔理三七二十一」都打×佢一餐先……」阿伯「七老八十」（一把年紀）都重咁好火氣，重連「七」字粗口都搬埋出嚟，睇嚟佢好痛恨啲賊。
呢個「七」字好使好用，真係名符其實嘅「神七」。
本文版權屬於粵語協會，轉載務必註明出處
| 