| 民國19年〈越華報〉朱棟單車行告白。留心字句「名嚜」、「咪芝蓮」（Michelin）、「每架」。
「嚜」今寫「嘜」，實為英文mark之音譯。近年，有廣州電視臺舉辦粵語唱歌比賽，居然以「嘜（麥）王爭霸」為名，實在令人拗晒頭，究竟金龜嘜贏抑或獅球嘜贏？「咪王爭霸」唔出得街咩？
至於「咪芝蓮」，正是家下出版〈米芝蓮指南〉教人搵美食嘅法國知名輪呔製造商米芝蓮公司，國語呌「米其林」。 舊時，單車仲係一「架」「架」，收音機係一「部」「部」，大戲先係一「臺」「臺」。家陣，單車變成一「臺」「臺」，連手提電話咁細部都斷「臺」計。 講返單車，好多老餅字句：「seat」、「鏈冚」、「鏈餅髀」、「嗹鐘」、「斜通」……上世紀六七十年代，有句說話好流行，講及國內三隻單車名「嘜」：「鳳凰襟靚，永久襟掟，五羊生腥」，「腥」即「鏽」也。當其時有架單車仲威過家下揸benz，不過日踩夜踩，用得十年八載，例必變「錢七」。 |
Powered by Discuz! X3.5 Licensed
© 2001-2024 Discuz! Team.
