「閂門」「熄機」要辨明 「開窗」「着燈」須分清

　　篇名係咪有少少怪呢，乜平時唔係講開「關門、關機、開燈」嘅咩？等我講畀你聽，現時主流講緊嘅廣府話口語，喺呢幾十年向普通話急速「埋堆」，好多習慣表達已經唔係原來嗰浸。

　　幾年之前香港一輯時政電視節目，談及來港定居人士生活狀況，其中一位來自東莞嘅小學生吐苦水，話同香港嘅朋友仔講嘢時，某啲粵語表達方式好唔一樣，搞到幾尷尬，仲舉咗個例：初嚟香港時，佢一路講住大陸帶落去嘅「關門」，而唔係香港人講「閂門」，成咗同學仔嘅笑柄，經過一段時間先至「撥亂反正」。殊不知，「閂門」亦係大陸粵語區地地道道嘅講法，尤其是上咗年紀嘅老廣東。點解會係地道粵語講法呢？單睇一個「閂」字，唔使解釋都知構字極為形象：一條門戌穿過門中間，有心人如果留意到以前大門嘅構造，多數都係兩掩門，然後中間橫趟門戌。「關門」當然都有講，不過多數係「關門大吉」呢類成語，執笠喎，大吉利市，少講為妙。

　　又譬如講，現時多數人都人手一部電腦、手提電話，「關機」於是乎就講到濫晒，電燈亦四圍都有，「關燈」就周街聽到，但係咪原汁原味嘅粵語講法呢？No，更加正宗嘅應該係「熄機」、「熄燈」，其實粵語嘅動詞分得好細，要停止需要消耗能源嘅物件運作通常講「熄」，你幾時聽過停車嘅司機會講「關匙」而唔係「熄匙」呢？咁實情粵語嘅「關」做唔做動詞嘅呢？做！不過現時冇乜人曉噏，舊底發人工事頭會叫「關工」，家陣香港償還貸款會講「關loan」，正係借「關」嘅舊義引申出嚟。

　　既然講到「熄燈」，佢嘅反義詞應該點講呢？係「着燈」啱過「開燈」。點解？「開」意思之一就係「將閉合嘅嘢打開」，相當於英文嘅「open」，有「開門」、「開罐頭」等；意思二係「開始」，有「開鑼」、「開波」等。但係咪全部嘢都用「開」呢？地道粵語裏面，電器係唔可以經常「開」嘅。古時候冇電，只能用火去點燈，所以「着燈」呢個講法沿用至今，歷史悠久，仲引申到其他電器，例如「着電腦」、「着電視」等。「開」字似乎更適用於「拆開啲電器」。無奈，今日「開燈」「關燈」之聲不絕於耳，並被年輕一代奉為正宗，固守嘅傳統人士，睇唔「開」又有乜用？

　　有人總結過，動詞用法之中，有關能量、能源嘅啲嘢通常用「着」「熄」，熄燈、熄車、熄機、熄火、熄電腦，有關通道嘅啲嘢通常用「開」「閂」，閂窗、閂門、閂閘、閂水喉、閂水掣。呢個話題引申開嚟仲有好多嘢講，另案再議。