粵語字詞有好多 邊啲最容易寫錯？

   網絡世代，寫嘢或傾偈以粵語成文甚為常見。然而大多數人不求甚解，只以同音、近音字代替，貫徹「睇得明就得啦」之「是是但但」精神。長此以往，以訛傳訛，錯字氾濫。爲此，略舉數例，附上正誤對照，以起提醒之效：

1、搞定——>搞掂

2、買單——>埋單

以上兩例皆南詞北傳，再經改造後反轉影響返粵人。

3、得5得嫁/嘎/價？——>得唔得㗎？

「唔」都唔寫，好懶啫！55555～～

4、比/俾錢——>畀錢

「畀」即「賜」，可見諸大量古文中，講多都譖氣。

5、緊係唔得——>梗係唔得

「緊」、「梗」唔分，純屬懶音之過。

6、果度——>嗰度

「果」、「嗰」唔分，亦係懶音之過。

7、大鍋飯年代——>大鑊飯年代

「鍋」、「鑊」讀音爭好遠，若然唔識分，就大鑊。

8、做物嘢——>做乜嘢

所謂「乜乜物物」，你又着住對乜襪？完全唔同音，好難分咩？

9、講咗滴乜也？——講咗啲乜嘢？

用pinyin打字法嘅初哥常見錯誤。

10、膝頭對上係大脾——>膝頭對上係大髀/肶

脾臟變大髀，脾氣差啲都激死。

11、怕距有牙——>怕佢有牙

「佢」同「距」，距離如此之遠。

12、體戲——>睇戲

莫非愛情動作片簡稱「體戲」？

13、我噶师傅喺黄飞鸿——>我嘅師傅係黃飛鴻

係：是；喺：在。「噶」係咩嚟？碌噶？

14、用腦淋也——>用腦諗嘢

皆因個腦淋過嘢，入晒水，先至諗唔到要寫個「諗」。

15、癡綫——>黐綫（「綫」、「線」爲異體字，兩者皆可）

癡：痴情；黐：粘合。雖則好多癡情漢都黐黐地，但黐綫佬未必痴情㗎！

16、中意——>鍾意

「一見鍾情」，「正中下懷」，一個平聲，一個去聲，你鍾意讀邊個音？

17、冇訂企——>冇埞企

冇訂坐位，唯有企住，邊間茶樓咁旺？

18、恰眼瞓——>瞌眼瞓

中午瞌一瞌，好過飲雞汁，瞌醒之時，恰好兩點正。

19、唔洗/駛客氣——>唔使客氣

「客氣」洗唔走，亦駛唔開，之但係好使得，善（使）用客氣語，敵人都變老友。

   須知道，粵語亦有規範可循，並非「求其up個音」之次等語言（註：「up」應寫「噏」）。有意「我手寫我口」之老友記，慎之，慎之！