近義字詞唔好「是但」 做人說話切勿「求其」

       形容「做事隨便」，廣東話有「是但」同「求其」。但係，「隨便」、「是但」、「求其」三者意思有別，不能相互代替。虛擬三段對話如下：

甲：「你揀阿花定阿娟做老婆？」

乙：「是但啦。」

甲：「嘩，乜你個人咁求其㗎！」

丙：「點啲乜嘢餸啊？」

丁：「是但啦，求其掙飽個五臟廟咪得囉。」

丙：「你睇吓你吖，做嘢又[laau4saau4]，辦事又[laau2gaau6]，把口又唔收，個人又[lau6bau6]，着衫又[lau1cau1]，成個人咧咧啡啡咁，邊有女仔睺㗎。

丁：「是Q但啦。」（「有女仔睺」或「冇女仔睺」，都冇相干）

茂：「入你屋企使唔使除鞋？」

己：「隨便啦/是但啦（除或唔除都得），當自己屋企得㗎喇。」

       「隨便」係「任意，冇拘束」嘅意思。「求其」形容做人做事之態度唔認真，「求其」至極，謂之「揦西」（據〈廣州語本字〉，本寫爲「俹簁」）。「求其」做事，雖不完美，但結果或尚可交差，但「揦西」爲之，結果必令人難以接受。故此，「求其」之升級版係「揦西」，而「求其」之潮語版則爲「hea做」。

至於「是但」則用於需要從兩個或多個之中選擇嘅場合，潜臺詞係「揀邊個/樣都冇所謂」。「是但」關乎選擇，「求其」關乎態度。本來，可以話人做事求其，但不可話人做嘢是但，但近數十年，越嚟越少人曉分「是但」同「求其」。幾年前，有人不滿CCTVB新聞審查，於無綫新聞直播時段，舉牌「突襲」成功。

「是但（旦）男」一夜成名。但查實，更準確嘅描述應該係「無綫新聞 求求其其」。另有一不文歇後語，「童子軍跳彈床——是鳩但但（scout彈彈）」，相信亦係九十年代後産物。