京劇粵化「啱河車」 北話南傳「Call Lao Ye」

       形容事情甚合心意，可曰「合晒心意」，可曰「啱心水」，亦可語帶玩笑曰「開正我嗰範」。但粵人講嘢鍾意刁鑽，要講「啱晒我河車」至爲之最生鬼。「河車」爲何物？當然唔係講緊?胎盤做中藥用嗰味「紫河車」，要解釋清楚，先從某個電視節目講起。

       幾年前，cctvb嘅前身TVB有一介紹粵劇粵曲嘅節目，名呌〈合晒合尺〉。當其時，相當多人對節目名大惑不解，因爲雖則寫「合尺」，但主持人汪阿姐卻讀作「河車」。查實粵語「啱晒河車」嘅「河車」眞身正係「合尺」，而「合尺」亦正好同「大戲」（粵劇）有關。

舊時粵曲曲譜係用工尺譜譜曲。工尺譜乃中樂記譜之一項偉大發明，同五綫譜、簡譜一樣，工尺譜自成體系，有「合」「士」「乙」「上」「尺」「工」「反」七個基本音，對應簡譜嘅「5 6 7 1 2 3 4 5」，其中「合」同「尺」，分別係簡譜嘅低音「5」同高音「2」。

二胡係粵劇中嘅重要樂器，其兩條弦分別呌「合綫」同「尺綫」，正係取「5」「2」兩個音。低音「5」共高音「2」，一個聽落似陽平聲，另一個聽落似陰平聲，呢兩個音悠長平穩，通常作爲樂器嘅調音準則。當兩條綫調好音，共同發出聲音時和諧順耳，咁就稱爲「啱晒合尺」。

       至於「合尺」何解變成「河車」，就要追溯返粵劇嘅發展過程。粵劇吸收相當多京劇元素，工尺譜發音亦沿用京音。「he chi」「he chi」，讀讀吓就演變成粵音「河車」。正如「Call Lao Ye」（「豈有此理」之意），實爲京劇之「可惱也」，當劇中角色嬲到吹鬚碌眼時，就爆句「可惱也」。後傳至南方嘅粵劇，之後再流落民間，反爲變成粵語獨家專有。