五月水漲扒龍船 俗語勿忘須承傳

戰國年代，有姓屈名原者，文才過人，奈何痴心錯付，愛國（君）不遂，被奸臣所屈而冇得撈，鬱住鬱住，最終投江自盡，世人爲紀念此君而設「端午節」，又稱「五月節」。此爲最多人相信嘅「端午節」來歷，皆因古仔夠吸引。亦有人認爲端午節與惡日（農曆五月，因仲夏瘟疫流行而得名）驅瘟避疫嘅習俗有關。

時至今日，五月節有兩大習俗仍不可或缺，一曰「食糉」，一曰「扒龍船」。論及「糉」，最流行一句俗語莫過於「未食五月糉，寒衣唔入櫳」，每年都有人炒冷飯解畫，此處不再重複。除食之外，查實「扒龍船」更多文化內涵，亦引申出若干廣東話俗語及字詞。

「船」、「艇」之別——「船」較大，設施較爲齊全，「艇」較細，較爲簡陋。公園遊湖嘅呌「艇」、「艇仔」，過大海嘅係「客船」、「水翼船」。

「屎艇快過龍船」——舊時城市糞便會運往四鄉肥田，因南番順河網發達，運送工具多爲艇仔，俗稱「屎艇」。「屎艇」裝滿「肥料」時，成條河道臭氣遠播，撞正順風，殺傷力更大，由此得「順風屎艇——快夾臭」之歇後語。若然有龍舟遇着屎艇駛來，爲免臭氣侵襲、穢物沾污，必定避讓，等佢順風而過，故此有「屎艇快過龍船」之說。

「撐屎艇」——部首「辶」、「廴」，廣東話稱「撐艇」，甚至「撐屎艇」。取此名純粹因形象相似，相對於「走之底」，更直觀易明，亦可見嶺南水鄉一帶，艇係何其普遍嘅搵食架生。

「撐」、「扒」、「棹」、「划」之別——驅動船、艇嘅動作，至少有四個，其中「劃」非廣東話專用。另外三個字，意思各異：當隻艇行於淺水水面，要用條長竹撐落水底，藉此推艇向前，此爲「撐船」、「撐艇」；槳喺船（艇）側邊向後推水謂之「扒」，一般艇仔通常用兩只槳扒，仲多數都係一人揸兩槳打交叉扒；細船或者艇仔要轉彎時，通常以槳喺船尾或接近船尾位置左右擺動以掌控船艇方向，此動則作爲之「棹」。因端午扒龍舟係鬥快，船上大部分人只需出力，唔使考慮方向，故此自然係「扒龍舟」而唔係「棹龍舟」。

    「龍舟水」與「西水大」——農曆四、五月正值端午前後，係廣東雨季，珠江流域暴雨頻繁，河水暴漲，於是此期間嘅降雨稱爲「龍舟水」。而廣東三條河流北江、東江、西江，其中西江嘅洪水最猛，影響廣州最大，因此每當水浸街，就有「西水大」一說。

代表五月節嘅音樂，相信非〈賽龍奪錦〉莫屬。有詞人爲純音樂配上粵語唱詞，描述龍舟競渡之場面，並由佛山名伶梁玉嶸演唱。端午當日附上此曲作應節之用。

另外，幾十年前經已有人以此曲改編成另一版本諧趣粵語詞，雖與龍船無關，但歌詞甚諧趣，睇完一笑無妨：

〈賣菜歌〉

為求賺兩餐 隨街去賣菜

白菜 绍菜 重有西洋菜 玻璃生菜以及塘蒿腐菜

芥蘭菜心 仲有香芹菜 貨色新鮮睇見都喝彩

大檔擺開 任你挑選 各位有幫襯就嚟莫走開

每斤賣個零啫 微利也無礙

（白：微中取利，抵買抵食架老友）

新出菠菜豆苗喫落甜滑附韭菜

擔兩斤半大椰菜 畁返兩文乾脆切開

幫襯我 呢一個賣菜盤你望發財你就發財 總也鴻運到來

（白：幫襯下啦先生阿大嬸呀，認真又平又靚㗎）

芥蘭個六 抵食過西生菜

啲菜心個三啫 冇將價改 實際平賣

盼大衆前來 搵返多少米飯錢就覺得心開

（白：公平交易，求其賺多少就算㗎喇喂小姐，先生呀，幫襯下啦）

剛啱一鎅發袋 啲西芹與辣椒洋蔥元荽韭菜 睇見即刻令人愛

蘿蔔醃酸炒鴨片 其實更加精呀彩

快手買啦塘蒿靚白菜 最抵買正式乾飛嘅紹菜

廟街阿姑 同福阿彩 如果仲買菜 必須買新鮮嘅菜

明碼實價幫襯就快行來 咪避開